رەسەيدە 160 كەلى ماريحۋانا ساتپاق بولعان قازاقستاندىق سوتتالدى

«چەليابى وبلىسىنىڭ برەدين اۋداندىق سوتى قازاقستان رەسپۋبليكاسىنىڭ ازاماتى گاميد احمەدوۆكە قاتىستى قىلمىستىق ءىس بويىنشا ۇكىم شىعاردى. ول ر ف ق ك 229.1-بابىنىڭ 4-بولىگىنىڭ «ب» تارماعىندا (ادامدار توبىنىڭ الدىن الا ءسوز بايلاسۋ نەگىزىندە ىسكە اسىرعان ەرەكشە كوپ مولشەردەگى ەسىرتكى زاتتاردىڭ كونترابانداسى)، ر ف 228.1-بابىنىڭ 5-بولىگىندە (ادامدار توبىنىڭ الدىن الا ءسوز بايلاسۋ نەگىزىندە ىسكە اسىرعان ەرەكشە كوپ مولشەردەگى ەسىرتكى زاتتاردى زاڭسىز وتكىزۋگە قاستىق ەتۋى) جانە 30-بابىنىڭ 3-بولىگىندە كورسەتىلگەن قىلمىستاردى جاسادى دەپ تانىلدى. سوت احمەدوۆكە 9 جىل باس بوستاندىعىنان ايىرۋ جازاسىن بەردى، ول جازانى قاتاڭ رەجيمدەگى كولونيادا وتەيدى»، - دەلىنگەن حابارلامادا.

احمەدوۆ قازاقستان رەسپۋبليكاسىنىڭ قوستاناي وبلىسىندا 158 كيلوگرامنان استام كاننابيس (ماريحۋانا) ەسىرتكى زاتىن الىپ، رەسەيدە ساتپاق بولعان.

2017-جىلدىڭ مامىرىندا 15 قاپقا سالىنعان ەسىرتكىنى رەسەي شەكاراسىنان الىپ وتپەك بولعان جۇك كولىگى ۇستالادى. جۇرگىزۋشىسى قاپتاردىڭ ىشىندە نە بارىنان حابارى بولماي شىعادى. ال «ەرەكشە جۇكتى» قارسى الۋ ءۇشىن احمەدوۆ چەليابى وبلىسىنىڭ برەدين اۋدانىنا بارادى. سول جەردە ول ءسوز بايلاسقان سىبايلاسىمەن بىرگە ۇستالادى.

ۇكىم زاڭدى كۇشىنە ەنگەن جوق. قىلمىسقا قاتىسى بار دەگەن ەكىنشى كۇدىكتىگە قاتىستى قىلمىستىق ءىس ءالى تەرگەلىپ جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى