قازاقستان گرۋزيا ارقىلى تاسىمالداناتىن مۇناي ەكسپورتىن 15 ميلليون تونناعا دەيىن ۇلعايتۋدى جوسپارلاپ وتىر

بىلتىر قازاقستان مۇنايى ترانس كاسپي باعىتى ارقىلى قارقىندى تاسىمالدانعان. گرۋزيا دا وسى ءدالىز بويىنشا ترانزيتتىك الەۋەتىن ارتتىرۋعا نيەتتى، دەپ حابارلايدى «حابار 24».

ترانس كاسپي حالىقارالىق كولىك باعىتى ەۋروپاعا قىتايدان باستالىپ، قازاقستان، كاسپي تەڭىزى، ازەربايجان، گرۋزيا جانە تۇركيانى باسىپ وتەدى. قازىر ەكسپورت تاسىمالىن ءارتاراپتاندىرۋ كەزىندە بۇل لوگيستيكالىق جولدىڭ ماڭىزدىلىعى ارتىپ وتىر.

ۆالەري چەچەلاشۆيلي، گرۋزيا ستراتەگيالىق ساراپتاما ورتالىعى باسقارماسىنىڭ مۇشەسى:

- بىزدە بىلتىر بۇل ءدالىز ارقىلى قازاقستاننان ەۋروپا مەن وزگە دە نارىقتارعا قاراي كومىرسۋتەكتەرىن تاسىمالداۋ ەداۋىر ۇلعايدى. ءۇردىس ودان ءارى كۇشەيەدى دەپ ويلايمىن. ەسكەرەتىن نارسە، مۇناي قۇياتىن تەرمينال قازاقستاندىق بيزنەسكە قارايتىنى ماڭىزدى. گرۋزيا قازاقستان كاسىپكەرلەرىنە قولايلى جاعداي جاساپ، ولاردىڭ ەلىمىز ارقىلى شيكىزاتتى ءتيىمدى باعادا تاسىمالداۋىنا ەرەكشە ءمان بەرەدى.

قازاقستان بيىل گرۋزيا ارقىلى 6,5 ميلليون توننا مۇناي تاسىمالداۋدى كوزدەپ وتىر. ال 2025 -جىلعا تامان ونىڭ كولەمىن 2 ەسەگە ۇلعايتپاق. ءبىراق ساراپشىلار ءدالىزدىڭ كەي بولىكتەرىندە بۇل جوسپاردى جۇزەگە اسىرۋعا كەدەرگىلەر تۋىنداۋى مۇمكىن دەيدى.

ۆاسو ۋرۋشادزە، ساراپشى:

- بىزدە پورتتاردىڭ ينفراقۇرىلىمى مەن تەمىرجول تاسىمالىنا قاتىستى ماسەلەلەر بار. ازەربايجان تاراپىنان كەدەرگىلەر تۋىنداپ تۇرادى. سەبەبى ول جاقتا جەكەمەنشىك كومپانيالار تاريفتەردى كوتەرەدى. بۇل ءبىزدىڭ ءدالىز ارقىلى جۇك تاسىمالداۋ تيىمدىلىگىن تومەندەتۋى مۇمكىن.

ساراپشىلار بولسا بارلىق لوگيستيكالىق ماسەلەلەردى اشىق تالقىلايتىن ۋاقىت جەتتى. گرۋزيا، ازەربايجان جانە قازاقستان ۇكىمەتى تۋىنداعان ماسەلەلەردى بىرلەسىپ شەشۋى قاجەت دەپ سانايدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى