الماتىلىق دارىگەرلەر 15 جاستاعى قىزعا كۇردەلى وپەراتسيا جاسادى
وتا مىندەتتى الەۋمەتتىك مەديتسينالىق ساقتاندىرۋ ەسەبىنەن قارجىلاندىرىلدى، دەپ حابارلايدى قازاقپارات ءتىلشىسى.
اۋرۋحانا باسپا ءسوز قىزمەتىنىڭ مالىمەتىنشە، بويجەتكەندى سوڭعى ءبىر جىلدا جوتەل مازالاعان. دارىگەرلەر تاعايىنداعان انتيبيوتيكتەر كۋرسى ناتيجە بەرمەگەن سوڭ ونى قوسىمشا تەكسەرۋگە جىبەرگەن.
فليۋوروگرافيا مەن كەۋدە قۋىسىنا جاسالعان كومپيۋتەرلىك توموگرافيا كەۋدە قۋىسىنىڭ سول جاعىندا پايدا بولعان ىسىكتى كورسەتتى. توراكالدى حيرۋرگتار كەڭەسە كەلە پاتسيەنتتى 1№ اۋرۋحانانىڭ توراكالدى حيرۋرگيا ورتالىعىنا جوسپارلى تۇردە جاتقىزۋ تۋرالى شەشىم قابىلدادى.
توراكالدى حيرۋرگيا ورتالىعىنىڭ مەڭگەرۋشىسى نۇرلان جارىلقاپوۆ، وپەراتسيالىق بلوك مەڭگەرۋشىسىنىڭ مىندەتىن اتقارۋشى مۇحتار نىسانباي، انەستەزيولوگ-رەانيماتولوگ ارمان الپىسبايەۆتىڭ قاتىسۋىمەن جۇرەك پەن كۇرەتامىرعا جاقىن ورنالاسقان ىسىكتى الىپ تاستادى.
ەكى ساعاتقا سوزىلعان وتا ءساتتى ءوتتى. وپەراتسيا مىندەتتى الەۋمەتتىك مەديتسينالىق ساقتاندىرۋ اياسىندا جاسالدى.
دارىگەر مۇحتار نىسانبايدىڭ ايتۋىنشا، توراكالدى حيرۋرگيا ورتالىعىندا كەۋدە قۋىسىنا، وكپەنىڭ، تراحەيانىڭ، مەدياستينانىڭ، وڭەشتىڭ، ءسۇت بەزىنىڭ قاتەرسىز ىسىگىنە، سونداي-اق تراحەيا مەن برونحقا، كەۋدە قۋىسىنىڭ دەفورماتسيالارىنا وپەراتسيالاردىڭ كەڭ سپەكترىن جاساۋعا مۇمكىندىك بار.
ەستەرىڭىزگە سالا كەتەيىك، 18 جاسقا دەيىنگى بالالار مەملەكەت تاراپىنان ساقتاندىرىلعان جانە تەگىن مەديتسينالىق كومەك الا الادى.
