قازاقستانعا 15 ەلدىڭ سايلاۋ كوميسسياسىنىڭ ءتوراعالارى كەلەدى
بۇل تۋرالى ق ر ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ ايتىپ بەردى، دەپ حابارلايدى قازاقپارات ءتىلشىسى.
«سايلاۋ ناۋقانى باستالعالى ورتالىق سايلاۋ كوميسسياسىنىڭ 25 وتىرىسى ءوتتى، ولار اۋماقتىق سايلاۋ كوميسسيالارىنىڭ، ۋاكىلەتتى مەملەكەتتىك ورگانداردىڭ جانە ب ا ق وكىلدەرىنىڭ قاتىسۋىمەن ونلاين وتكىزىلىپ كەلەدى. تىكەلەي ينتەرنەت- ترانسلياتسيالار جۇرگىزىلەدى. بارلىق وتىرىستارعا حالىقارالىق بايقاۋشىلار شاقىرىلادى. پالەستينا مەملەكەتىنىڭ قازاقستانداعى توتەنشە جانە وكىلەتتى ەلشىسى مونتاسير ابۋزەيد اككرەديتتەۋگە ءبىرىنشى بولىپ قۇجات تاپسىردى. سونىمەن قاتار، ماجارستان، گەرمانيا، يندونەزيا، كانادا، ا ق ش، تۇركيا، فينليانديا، فرانسيا، شۆەتسيا، ەستونيا سياقتى ەلدەردىڭ ەلشىلەرى، ارمەنيا، بەلارۋس، ۇلى بريتانيا، يراك، يران، قىتاي، قىرعىزستان، نيدەرلاندى، رەسەي فەدەراتسياسى جانە تايلاند ەلشىلىكتەرىنىڭ قىزمەتكەرلەرى اككرەديتتەلگەن»، - دەدى ن. ءابىدروۆ شەتەلدىك ديپلوماتيالىق كورپۋس وكىلدەرىنە ارنالعان بريفينگتە.
ونىڭ ايتۋىنشا، ەكىجاقتى ىنتىماقتاستىق جەلىسى بويىنشا الداعى سايلاۋدى باقىلاۋ ءۇشىن 15 ەلدىڭ ورتالىق سايلاۋ كوميسسيالارىنىڭ وكىلدەرى، ونىڭ ىشىندە ازەربايجان، ارمەنيا، قىرعىزستان، تاجىكستان، تۇرىكمەنستان جانە وزبەكستان ورتالىق سايلاۋ كوميسسيالارىنىڭ ءتوراعالارى كەلەدى.
ايتا كەتەيىك، ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى مەن ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ شەتەلدىك ديپلوماتيالىق كورپۋس وكىلدەرىنە الداعى پرەزيدەنت سايلاۋىنا دايىندىق تۋرالى باسپا ءسوز ءماسليحاتىن وتكىزدى.
پرەزيدەنتتىك سايلاۋعا 10101 ۋچاسكە ازىرلەندى، ونىڭ ىشىندە 53 ەلدە 68 سايلاۋ ۋچاسكەسى قۇرىلدى. سايلاۋشىلار تىزىمىنە 11 ميلليوننان استام قازاقستاندىق ەندى.
