جامبىلدا وزات شوپان مەن جىلقىشىعا 15 ميلليون تەڭگەدەن بەرىلدى
رەسپۋبليكالىق مالشىلار سلەتى اياسىندا تارازدا «اۋىل شارۋاشىلىعى» سكۆەرىنىڭ، داڭقتى شوپان بەينەلەنگەن بارەلەفتىڭ اشىلۋى، م. ح. دۋلاتي اتىنداعى تاراز وڭىرلىك ۋنيۆەرسيتەتىندە ج. قۋانىشبايەۆقكا ارنالعان ءبىرىنشى رەسپۋبليكالىق عىلىمي- پراكتيكالىق كونفەرەنتسيا ءوتتى. ت. رىسقۇلوۆ اۋدانىندا اسىل تۇقىمدى اۋىل شارۋاشىلىعى جانۋارلارى مەن اۋىل شارۋاشىلىعى تەحنيكاسىنىڭ كورمەسى ءوتتى.
«داڭقتى شوپان جازىلبەك قۋانىشبايەۆ سوعىستان كەيىنگى جاڭا ءومىردىڭ قالىپتاسۋىنا ولشەۋسىز ۇلەس قوستى. ول العاشقىلاردىڭ ءبىرى بولىپ قاراكول قويىن ءوسىرۋدى قولعا الدى. بيىل وڭىردە ءبىرقاتار ءىس- شارا جوسپارلانعان. «جالپاق جۇرتتىڭ جاز اتاسى» كىتابىنىڭ تۇساۋى كەسىلدى»، - دەدى جيىندا وبلىس اكىمى بەردىبەك ساپاربايەۆ.
كورمەگە اسىل تۇقىمدى بۇقالار، جىلقىلار، گولشتەين- فريز جانە شۆەيتساريالىق سيىرلار، سونداي- اق جاڭا اۋىل شارۋاشىلىعى تەحنيكالارى ۇسىنىلدى. باسقوسۋ بارىسىندا مال شارۋاشىلىعىن، اگروونەركاسىپ كەشەنىن دامىتۋدىڭ كەڭ اۋقىمدى ماسەلەلەرى، قازاقستان رەسپۋبليكاسىنىڭ اگروونەركاسىپتىك كەشەنىن دامىتۋدىڭ 2021-2025 -جىلدارعا ارنالعان ۇلتتىق جوباسىن ىسكە اسىرۋ تەتىكتەرى تالقىلاندى.
اۋىل شارۋاشىلىعى باسقارماسىنىڭ مالىمەتىنشە، بۇگىندە وبلىستا مال باسى ارتۋدا، ناقتىراق ايتساق:
ءىرى قارا سانى - 10,7 پايىزعا، ۇساق مال - 3,7 پايىزعا، جىلقى - 5,2 پايىزعا، تۇيە - 7,5 پايىزعا وسكەن.
قوناقتارعا ارنالىپ سپورت جانە مادەني شارالار ۇيىمداستىرىلدى. كورمە ءتۇرلى نوميناتسيالار بويىنشا جەڭىمپازداردى سالتاناتتى تۇردە ماراپاتتاۋ راسىمىمەن تۇيىندەلدى. سالا ارداگەرلەرى اۋىل شارۋاشىلىعى مينيسترلىگىنىڭ «ەڭبەك ارداگەرى» جانە «اۋىل شارۋاشىلىعى سالاسىنىڭ ۇزدىگى» توسبەلگىلەرىمەن ماراپاتتالدى.
«مۇنداي دەڭگەيدە مالشىلاردىڭ سلەتى العاش رەت ءوتىپ وتىر. ءبىز وزەكتى ماسەلەلەردى تالقىلاۋعا، تاجىريبە الماسۋعا مۇمكىندىك الدىق. ەلىمىزدىڭ جانە وبلىس باسشىلىعىنا كورسەتكەن قولداۋى مەن ىقىلاسى ءۇشىن العىسىمىزدى بىلدىرەمىز»، - دەدى «ۇزدىك شوپان» نوميناتسياسىن جەڭىپ العان ت. رىسقۇلوۆ اۋدانىنان كەلگەن سەيتبەك دۇيسەنوۆ.
وبلىس اكىمى بەردىبەك ساپاربايەۆ شارۋا قوجالىقتىڭ وزات شوپانى مەن جىلقىشىسىنا 15 ميلليون تەڭگە كولەمىندە سەرتيفيكات تابىس ەتتى. بۇل قارجى ولاردىڭ وتباسى ءۇشىن تۇرعىن ءۇي سالۋعا جۇمسالماق. سونداي- اق، ايماق باسشىسى «جىلى بۇلاق مەركى» شارۋا قوجالىعىنىڭ شوپانىنا «Lada Vesta» اۆتوكولىگىنىڭ كىلتىن تابىستادى.
