قازاقستاندا جىل سايىن 15 مىڭ ادام وبىردان كوز جۇمادى
بۇل جايىندا ق ر دەنساۋلىق ساقتاۋ مينيسترلىگىنىڭ فەيسبۋكتەگى پاراقشاسىندا جاريالانعان اقپاراتتا ايتىلعان، دەپ حابارلايدى قازاقپارات ءتىلشىسى.
«جىل سايىن ەلىمىزدە وبىردىڭ شامامەن 35 مىڭعا جۋىق جاڭا دەرەكتەرى تىركەلەدى. بۇگىندە شامامەن 179 مىڭ قازاقستاندىق ديسپانسەرلىك ەسەپتە تۇر. ءبىر جىلدا ونكولوگيالىق اۋرۋدان شامامەن 15 مىڭ ادام قايتىس بولادى. اۋرۋ-سىرقاۋ قۇرىلىمىندا ءبىرىنشى ورىندا ءسۇت بەزى وبىرى (12,6 پايىز)، ەكىنشى ورىندا وكپە وبىرى (9,9)، ءۇشىنشى ورىندا اسقازان وبىرى (7,4)، ءتورتىنشى ورىندا جاتىر مويىنى مەن توق ىشەك وبىرى (4,7) تۇر»، - دەلىنگەن مينيسترلىك مالىمەتىندە.
ۆەدومستۆونىڭ اتاپ وتۋىنشە، وتكەن جىلى ق ر ۇكىمەتى 2018-20252-جىلدارعا ارنالعان ونكولوگيالىق اۋرۋلارمەن كۇرەستىڭ كەشەندى جوسپارىن قابىلدادى. اتالعان جوسپار تاۋەكەلدەردىڭ الدىن الۋ جانە فاكتورلاردى باسقارۋ، تيىمدىلىگى جوعارى ەرتە دياگنوستيكالاۋ، ونكولوگيالىق كومەكتىڭ ينتەگراتسيالانعان مودەلىن ەنگىزۋ، كادرلىق الەۋەت پەن عىلىمدى دامىتۋ سىندى 4 باعىتتى قاراستىرادى.
سونىمەن قاتار، وسى جوسپار اياسىندا ونكولوگيالىق كومەك كورسەتەتىن ۇيىمداردىڭ ستاندارتتارى جەتىلدىرىلۋدە. ماسەلەن، قازاق ونكولوگيا جانە راديولوگيا عىلىمي-زەرتتەۋ ينستيتۋتى ونكولوگيالىق اۋرۋلار بويىنشا 30 كلينيكالىق حاتتامانى وزەكتەندىردى. قازىرگى ۋاقىتتا بۇل حاتتامالار ق ر دەنساۋلىق ساقتاۋدى دامىتۋ رەسپۋبليكالىق ورتالىعىندا ساراپتامادان وتكىزىلىپ جاتىر.
مۇنان بولەك، ق ر ۇكىمەتىنىڭ «ۇلتتىق عىلىمي ونكولوگيالىق ورتالىق» ج ش س قۇرۋ تۋرالى قاۋلىسى قابىلداندى. ورتالىقتى قۇرۋ تۇجىرىمداماسى ەل ۇكىمەتىندە تالقىلانىپ، پرەمەر-مينيستر ماقۇلدادى. جاڭا عىلىمي مەكەمە «UniversityMedicalCentre» كورپوراتيۆتىك قورى ۇلتتىق ونكولوگيا جانە ترانسپلانتولوگيا عىلىمي ورتالىعى اۋماعىندا سالىناتىن بولادى. الماتى، اتىراۋ، قىزىلوردا، ماڭعىستاۋ، شىعىس قازاقستان وبلىستارىنندا دا ونكولوگيالىق ورتالىقتارى بار كوپبەيىندى كلينيكالار سالۋ ماسەلەسى تالقىلانعان.
ەستەرىڭىزگە سالا كەتسەك، جىل سايىن 4- اقپاندا حالىقارالىق وبىرعا قارسى وداق باستاماسىمەن دۇنيەجۇزىلىك وبىرعا قارسى كۇرەس كۇنى اتاپ وتىلەدى.
