زاڭسىز شىرشا كەسكەندەرگە سالىناتىن ايىپپۇل 15 ەسە ءوستى
جىل سايىن 1-31 -جەلتوقسان ارالىعىندا قىلقان جاپىراقتى اعاشتاردى زاڭسىز كەسكەنى ءۇشىن سالىناتىن ايىپپۇل كولەمى 15 ەسە وسىرىلەدى. وسىعان قاراماستان شىرشاعا شۇيلىگىپ، زاڭدى بەلشەسىنەن باساتىندار قاتارى ازايار ەمەس. جاقىندا پوليتسيا قىزمەتكەرلەرى زاڭسىز شىرشا كەسكەن قوستاناي وبلىسىنىڭ ءتورت تۇرعىنىن ۇستادى.
21 -جەلتوقساندا پرەسنوگوركوۆكا اۋىلىنان ءبىر شاقىرىم جەردەگى پەرۆوماي ورمان شارۋاشىلىعىندا ءتارتىپ ساقشىلارى پەسچانكا اۋىلىنىڭ ەكى تۇرعىنىن جانە كيروۆ اۋىلىنىڭ ازاماتىن ۇستادى.
22 -جەلتوقساندا كەشكى ۋاقىتتا قوستاناي قالالىق پوليتسيا بولىمشەسىنىڭ كەزەكشى بولىمىنە ورمان كۇزەتشىسى جۇگىنىپ، سادوۆىي كەنتىنىڭ ماڭىنداعى ورمان شەتىنەن اعاش تيەلگەن اربانى بايقاعانىن حابارلايدى. ءىز كەسكەن پوليتسيا قىزمەتكەرلەرى 4 قاراعاي اعاشىن تيەگەن سادوۆىي كەنتىنىڭ تۇرعىنىن قولعا ءتۇسىردى. اتالعان فاكتىلەر بويىنشا سوتقا دەيىنگى تەرگەۋ ءجۇرىپ جاتىر.
