قازاقستاندا الەمدىك دەڭگەيدەگى 15 كەن ورنى اشىلۋى مۇمكىن
«زاڭ جوباسىندا جەر قويناۋىن پايدالانۋ سالاسىنىڭ اشىقتىعىن جانە بولجامدىلىعىن ارتتىرۋ كوزدەلگەن. سونىمەن قاتار ەڭ ۇزدىك الەمدىك تاجىريبەنى پايدالانا وتىرىپ، بارلىق پايدالى قازبالار ءۇشىن كەلىسىمشارت جاساسۋدى وڭتايلاندىرىلعان ءتاسىلى ەنگىزىلەدى. بۇل قۇجات سالالىق قاۋىمداستىق پەن بيزنەس وكىلدەرىنىڭ قاتىسۋىمەن ازىرلەنگەن. كودەكس جوباسى جەر قويناۋىن پايدالانۋشىلاردىڭ جۇمىسىندا كەزدەسەتىن كەدەرگىلەردى جويىپ، سالانىڭ قۇقىقتىق بازاسىن جەتىلدىرۋگە، حالىقارالىق ستاندارتتارعا وتۋگە ءارى ينۆەستيتسيالىق كليماتتى جاقسارتىپ، سالاعا تىكەلەي شەتەلدىك ينۆەستيتسيالاردى تارتۋعا باعىتتالعان»، - دەدى ق ر ينۆەستيتسيالار جانە دامۋ ءمينيسترى جەڭىس قاسىمبەك زاڭ جوباسى بويىنشا بايانداماسىندا.
ونىڭ سوزىنە قاراعاندا، بۇگىنگى تاڭدا 104 ەلدىڭ ىشىندە قازاقستان گەولوگيا سالاسىن مەملەكەتتىك رەتتەۋ بويىنشا تەك 74- ورىندا تۇر. ال جەر قويناۋىنىڭ گەولوگيالىق تارتىمدىلىعى جاعىنان 45- ورىندا.
«بۇل رەفورما الەمدە بولىپ جاتقان داعدارىس پەن ونىڭ سالدارىنان ينۆەستور تارتۋعا بايلانىستى باسەكەلەستىكتىڭ ارتۋىنان تۋىنداپ وتىر. ۇزاق مەرزىمدى شيكىزات تاسىمالىنىڭ تۇراقتىلىعى، جۇرىگىزىلەتىن ساياسات پەن سالاداعى اشىقتىق جانە راسىمدەردىڭ جەڭىلدىگى - بۇگىنگى كۇننىڭ باستى تالابى. بۇل كودەكس جوباسىن ازىرلەۋ بارىسىندا اۆستراليالىق زاڭ مودەلىن ۇلگى رەتىندە الدىق. مۇنداي شەشىم ءبىر جارىم جىلدىق زەرتتەۋ جۇمىستارى مەن دۇنيەجۇزىلىك بانك ۇسىنىسى ناتيجەسىندە قابىلداندى. الەم بويىنشا اۆستراليانىڭ تاجىريبەسى ۇزدىك دەپ سانالادى. بۇل ينۆەستورلاردىڭ دا بەرگەن باعاسى»، - دەپ ءتۇسىندىردى مينيستر.
ماككەنزيدەگى كەڭەسشىلەر ەسەبىنىڭ تۇجىرىمىنا قاراعاندا، جاپپاي گەولوگيالىق بارلاۋ تەتىگى ىسكە قوسىلعان جاعدايدا، قازاقستاندا الەمدىك دەڭگەيدەگى كەم دەگەندە 15 كەن ورنىن، سونداي- اق تاۋ- كەن رۋداسى ايماقتارىن اشۋ بولجانىپ وتىر.
«ەڭ باستىسى، قازاقستان گەولوگيالىق بارلاۋدا ساپالى ءارى تىڭعىلىقتى زەرتتەلەدى. مىسالى، قازاقستاندا 1 شارشى شاقىرىم ەسەبىنەن بارلاۋعا 7 ا ق ش دوللارى جۇمسالادى، اۆستراليادا - 167 دوللار، ا ق ش- تا - 87، كانادادا - 203 دوللار قارجى باعىتتالادى. ياعني بۇگىندە گەولوگيالىق بارلاۋعا جۇمسالاتىن ينۆەستيتسيالار ەلدىڭ قورىن تولتىرۋدى قامتاماسىز ەتپەيدى»، - دەدى جەڭىس قاسىمبەك.
اۆتور: رۋسلان عابباسوۆ
