وسكەمەندە مەرەكەلىك پارادقا 15 مىڭنان استام ادام قاتىستى - فوتو
ش ق و اقپاراتتىق ورتالىعىنان مالىمدەگەندەي، قازاقستان حالقى بىرلىگى كۇنىن شقو جۇرتشىلىعى بارلىق اۋدان، اۋىل- ايماقتاردا وزىندىك ءسان سالتاناتىمەن اتاپ وتۋدە. ال وبلىس ورتالىعىنىڭ تۇرعىندارى ءدال وسى كۇنى ەل بىرلىگىنىڭ ايقىن بەلگىسىن كورسەتتى.
15 مىڭنان استام وسكەمەندىك استانا كوشەسىنەن باستاپ رەسپۋبليكا الاڭىنا دەيىن «مەن قازاقستاننىڭ پاتريوتىمىن» سالتاناتتى شەرۋىن ۇيىمداستىردى. 5518 اسكەري ءبولىمىنىڭ وركەسترى باستاعان سالتاناتتى شەرۋگە ءارتۇرلى ەتنومادەني بىرلەستىكتەردىڭ وكىلدەرى، بايكەرلەر مەن «بيپەك اۆتو» اۆتوكولىكتەر تىزبەگى، «كازسينك» ا ق، «ءۇ م ز» ا ق، «وسكەمەن ت م ك»، «ازيا اۆتو» ا ق سىندى 88 كاسىپورىن مەن ۇيىمداردىڭ جۇمىسشىلارى، مەملەكەتتىك مەكەمەلەردىڭ، ج و و جانە كوللەدج ستۋدەنتتەرى، قالا مەكتەپتەرىنىڭ وقۋشىلارى قاتىستى.
بۇدان سوڭ شەرۋگە قاتىسۋشىلار قازاقستان حالقى اسسامبلەياسىنىڭ 20 جىلدىق مەرەيتويىنا وراي اسپانعا 20 كوگەرشىن مەن 20 مىڭ شار ۇشىردى. بىرلىك كۇنى مەرەكەلىك كونسەرتكە ۇلاسىپ، دوستىقتى تۋ ەتكەن ونەرپازدار شىعىس جۇرتشىلىعىن ءان- بيىمەن قۋانتتى. جينالعان حالىقتى بىرلىك كۇنىمەن وبلىس اكىمى دانيال احمەتوۆ قۇتتىقتادى.
«ەلىمىزدىڭ باعا جەتپەس باستى بايلىعى - بەرەكەسى مەن بىرلىگى جاراسقان، تاتۋلىق پەن كەلىسىمنىڭ تۋىن تىككەن كوپۇلتتى حالقى. 1 -مامىر - قازاقستان حالقىنىڭ مىزعىماس دوستىعىنىڭ، وتانعا دەگەن ماڭگىلىك ماحابباتىنىڭ مەرەكەسى! بۇگىنگى مەيرام - كەمەڭگەر پرەزيدەنتىمىز نۇرسۇلتان ءابىش ۇلى نازاربايەۆتىڭ سارابدال ساياساتىنىڭ سالتاناتتى كورىنىسى. سىزدەردى قازاقستان حالقىنىڭ بىرلىگى مەرەكەسىمەن شىن جۇرەكتەن قۇتتىقتايمىن!»، - دەدى ايماق باسشىسى.
سونىمەن قاتار، ءدال وسى كۇنى قالاداعى جامبىل، جاستار، مەتاللۋرگ، ساۋلەتاي ساياباقتارى اشىلىپ، وندا بالالارعا ارنالعان مەرەكەلىك كونسەرتتەر ۇيىمداستىرىلماق. سونداي-اق، رەسپۋبليكا الاڭىندا «اۆتوەكزوتيكا 2015» كورمەسى وتكىزىلىپ، قر پرەزيدەنتىنىڭ كەزەكتەن تىس سايلاۋىنا بەلسەنە ات سالىسقان وسكەمەن قالاسىنىڭ وقۋ ورىندارىن ماراپاتتاۋ جوسپارلانعان. سونداي- اق، وسى كۇنى قالا ونەرپازدارى مەن ونەر ۇجىمدارىنىڭ قاتىسۋىمەن «ستۋدەنتتىك كوكتەم» جاستار ءبي كەشى وتكىزىلەدى.
