نازاربايەۆ ۋنيۆەرسيتەتىنىڭ گرانتىنا 15 ەلدىڭ وقۋشىلارى تالاسىپ جاتىر
بۇل تۋرالى مالىمەتتى جاۋتىكوۆ اتىنداعى دارىندى بالالارعا ارنالعان رەسپۋبليكالىق مامانداندىرىلعان فيزيكا-ماتەماتيكا ورتا-مەكتەپ ينتەرناتىنىڭ باسپا ءسوز قىزمەتى تاراتتى. 11- قاڭتاردا باستالعان ماتەماتيكا، فيزيكا جانە ينفورماتيكا پاندەرى وليمپياداسى 17- قاڭتار كۇنى قورىتىندىلانادى.
باسپا ءسوز قىزمەتىنىڭ حابارلاۋىنشا، وليمپياداعا قازاقستان، رەسەي، ۋكراينا، بەلارۋس، ءازىربايجان، ارمەنيا، گرۋزيا، قىرعىزستان، تاجىكستان، تۇرىكمەنستان، وزبەكستان، بولگاريا، رۋمىنيا، سەربيا جانە موڭعوليا ەلدەرىنەن 60 كوماندا قاتىسادى، بارلىعى - 400 سايىسكەر. حالىقارالىق قازىلار القاسى قۇرامىندا قازاقستان، رەسەي، بولگاريا، گرۋزيا، ارمەنيا، ءازىربايجان، بەلارۋس، ۋكراينا جانە وزبەكستان عالىمدارى بار، القا ءتوراعاسى - ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆ. پاندىك وليمپيادانىڭ دەمەۋشىسى - Microsoft Kazakhstan جاۋاپكەرشىلىگى شەكتەۋلى سەرىكتەستىگى.
ەسكە سالا كەتەيىك، بىلتىر اقپان ايىندا ەلىمىزدىڭ بەس وبلىسىندا قىز بالالارعا ارنالعان «ىبىراي التىنسارين-2014» رەسپۋبليكالىق پاندىك وليمپيادا وتكەن بولاتىن. وليمپيادادان جوعارى ناتيجەگە قول جەتكىزگەن قىز بالالارعا قازاق مەملەكەتتىك قىزدار پەداگوگيكالىق ۋنيۆەرسيتەتىنە تۇسۋگە جول اشىلدى. وليمپيادانىڭ ءار پانىنەن العاشقى ءۇش ورىندى يەلەنگەندەر مەن ۇ ب ت-عا قاجەتتى ءوتۋ بالىن العاندار ۋنيۆەرسيتەت رەكتورىنىڭ شاكىرت اقىسىز گرانتىنا يە بولدى.
