ومبى وبلىسىنىڭ قازاق ۇلتتىق-مادەني اۆتونومياسى 15 جىلدىعىن اتاپ ءوتتى
ومبى وبلىسىنىڭ قازاق ۇلتتىق-مادەني اۆتونومياسى 15 جىلدىعىنا ارنالعان اتالعان شاراعا 1 مىڭنان استام ادام قاتىستى. ومبى وبلىسى مەن ومبى قالاسىنىڭ باسشىلىعى ۇلتتىق بىرلەستىكتى مەرەيتويىمەن قۇتتىقتادى»، - دەلىنگەن ومبى وبلىسى ۇكىمەتىنىڭ رەسمي سايتىندا.
ومبى وبلىسى ۇكىمەتى ءتوراعاسىنىڭ ورىنباسارى، گۋبەرناتوردىڭ جانە ومبى وبلىسى ۇكىمەتىنىڭ اپپارات باسشىسى ۆلاديمير كومپانەيشيكوۆ ۇيىم جەتەكشىسى بوتا باكۋلينگە ءوڭىر باسشىسىنىڭ قولى قويىلعان قۇتتىقتاۋ قاعازىن تاپسىردى.
وندا ۆيكتور نازاروۆ حالىقتىق داستۇرلەردى جانە ۇلتتىق ءتىلدى ساقتاۋدا ۇيىمنىڭ ۇلەسىن جوعارى باعالاعان.
«اۆتونوميانىڭ شىعارماشىلىق، سپورتتىق جانە جاستارعا ارنالعان بىرلەستىكتەر ءوڭىردىڭ قوعامدىق ومىرىنە بەلسەندى ارالاسۋدا، حالىقتاردىڭ ەتنومادەني دامۋىنا زور ۇلەسىن قوسۋدا، ومبى وبلىسىنىڭ ۇلتارالىق كەلىسىمىنە اتسالىسۋدا»، - دەلىنگەن گۋبەرناتوردىڭ قۇتتىقتاۋ سوزىندە.
كونسەرتتە ومبى وبلىسىنىڭ ارتىستەرى عانا ەمەس، قازاقستان رەسپۋبليكاسىنىڭ ونەر مايتالماندارى دا ءوز باعدارلامالارىن ۇسىندى.
ومبى وبلىسىنىڭ قازاق ۇلتتىق-مادەني اۆتونومياسى 1999-جىلى قۇرىلدى جانە رەسەيدە جۇمىس ىستەي باستاعان العاشقى ەتنو-مادەني بىرلەستىكتەردىڭ ءبىرى. ۇيىمنىڭ جانىنان «ومبى قازاقتارى» اتتى باسىلىم شىعادى، بارلىق ۇلتتىق مەرەكەلەردى اتاپ ءوتۋ دە داستۇرگە اينالعان. اۆتونوميانىڭ ءوز لوگوتيپى دە بار.
اۆتور: جاسۇلان جولدىبايەۆ
