الماتى تۇرعىندارىنىڭ ورتاشا جالاقىسى 155 مىڭ تەڭگەنى قۇرادى
وتكەن جىلدىڭ قورىتىندىسى بويىنشا شاھار تۇرعىندارىنىڭ ورتاشا جالاقىسى 155 مىڭ تەڭگەنى قۇرادى. جالپى سوڭعى 5 جىلدا الماتى قالاسىنىڭ ىشكى جالپى ءونىمى 2 ەسە ۇلعايىپ، بۇگىندە 8 تريلليون تەڭگەگە جەتىپ وتىر. تەك بىلتىردىڭ وزىندە 1 ميلليون 300 مىڭ شارشى مەتر تۇرعىن ءۇي پايدالانۋعا بەرىلىپ، 20 مىڭ وتباسى باسپانالى بولدى.
بۇگىن قالا جۇرتشىلىعىنىڭ الدىندا ەسەپ بەرگەن الماتى اكىمى احمەتجان ەسىموۆتىڭ ايتۋىنشا، مۇنداي قۇرىلىس قارقىنى، ءتىپتى كەڭەس ۇكىمەتى ءداۋىرىنىڭ كەمەلدەنگەن تۇسىندا دا بولعان ەمەس. مۇنىمەن قاتار قالا باسشىلىعى ەڭ كۇردەلى دەگەن ماسەلەنىڭ ءتۇيىنىن تارقاتىپ، بازارلاردى رەتكە كەلتىردى.
زامان تالابىنا ساي كەلمەيتىن بارلىق ساۋدا نۇكتەلەرى جويىلىپ، ولاردىڭ ورنىنا 6 زاماناۋي ساۋدا ورتالىعى بوي كوتەردى. وسىنداي تاعى 9 نىساننىڭ قۇرىلىسى قازىر جالعاسۋدا. سونداي-اق ءوندىرىس سالاسىنىڭ اياسى ۇلعايىپ، جاڭا جۇمىس ورىندارى دا اشىلۋدا.
مىسالى يننوۆاتسيالىق تەحنولوگيالار پاركىندە قازىر 160 مەكەمە جۇمىس ىستەيدى. ال الاتاۋ اۋدانىنداعى يندۋستريالدى ايماقتىڭ العاشقى ءوندىرىس وشاعىن بيىلعى جىلدىڭ سوڭىنا دەيىن ىسكە قوسۋ جوسپارلانىپ وتىر.
احمەتجان ەسىموۆ، قالا اكىمى:
- بۇگىندە جالپى قۇنى 230 ميلليارد تەڭگەنىڭ 28 جوباسىن تاڭداپ الدىق. بۇل نەگىزىنەن ماشينا جاساۋ، قۇرىلىس يندۋسترياسى، تاماق، حيميا جانە فارماتسيەۆيتكالىق وندىرىستەر. بيىلدىڭ وزىندە الاتاۋ يندۋستريالدى ايماعىنداعى قۇرىلىس جۇمىستارىنىڭ وزىنە ينۆەستورلار 1500 ادامدى جۇمىسقا تارتپاق. كەلەسى جىلى بۇل كورسەتكىش 6 مىڭعا جەتەدى دەپ جوسپارلانىپ وتىر. ال كەلەشەكتە وندا 20 مىڭ ادام جۇمىس ىستەپ، جىل سايىن يندۋستريالدى ايماق بيۋدجەتكە 7 ميلليارد تەڭگە سالىق بەرەتىن بولادى.
www.24.kz
