ۆيتسە-مينيستر ۇ ب ت ەرەجەسىن بۇزىپ، ناتيجەسى جويىلعان 153 تالاپكەرلەرگە قاتىستى پىكىر ءبىلدىردى

«مەكتەپتەن شىققان وقۋشىلاردىڭ باسىم كوپشىلىگى ۇلتتىق ءبىرىڭعاي تەستىلەۋ تاپسىرعان كەزدە ءتۇرلى ەرەجەنى بۇزۋ ارەكەتتەرىنە ۇمتىلىپ تۇرادى. ءبىراق جىل بويى دايىندالماعان بالاعا ول كومەكتەسپەيدى. زاڭسىز جولمەن العان بالدارى ەرەجەنىڭ تارتىبىنە ساي 31-جەلتوقسانعا دەيىن تەكسەرىلەدى. ۇ ب ت جازدا اياقتالادى. ال تامىز ايىندا تالاپكەرلەر وقۋعا ءتۇسىپ، قىركۇيەكتە ساباققا كىرەدى. وسى ارالىقتا پوست-مونيتورينگ جۇرگىزىلەدى. كوميسسيا قۇرىلىپ، بارلىق بالانىڭ تەستىلەۋ كەزىندەگى بەينەجازباسى قايتا قارالادى. وعان ءبىرشاما ۋاقىت كەرەك. بۇگىنگى تاڭدا زاڭسىز بالل جيناعان 153 بالا انىقتالدى»، - دەپ تەكسەرىس جۇمىستارىنىڭ ناتيجەسىمەن ءبولىستى ۆيتسە-مينيستر.

تالعات ەشەنقۇلوۆ بۇل وقۋشىلاردىڭ ناتيجەلەرى جويىلعانمەن، ولار ۇ ب ت- نى اقىلى نەگىزدە قايتا تاپسىرا الاتىنىن مالىمدەدى.

«ۇلتتىق ءبىرىڭعاي تەستىلەۋدى جىل بويى بەس رەت تاپسىرادى. ونىڭ ەكەۋى گرانت الۋ ءۇشىن، ۇشەۋى اقىلى نەگىزدە وقۋعا ءتۇسۋ ءۇشىن. وسى 153 بالانىڭ ۇ ب ت- دان اقىلى تۇردە وتكەنىن راستايتىن سەرتيفيكاتى بولسا، وندا تالاپكەر ۋنيۆەرسيتەتكە اقىلى فورماعا اۋىسىپ، ءارى قاراي وقۋىن جالعاستىرادى. ەگەر ونداي سەرتيفيكاتى بولماسا، ول سول وقۋ ورنىنا شارتتى تۇردە قابىلدانادى. كەيىن قاڭتار ايىندا قايتادان ۇ ب ت تاپسىرىپ، 50-دەن جوعارى بالل جيناسا، ول ءارى قاراي وقي بەرەدى. شەكتى بالل جيناي الماعان جاعدايدا بالا وقۋدان شىعارىلادى»، - دەدى تالعات ەشەنقۇلوۆ.

ايتا كەتەيىك، بۇعان دەيىن ۆيدەوجازبالاردى تەكسەرۋ قورىتىندىسى بويىنشا بيىل گرانتقا ىلىنگەن 137 تالاپكەردىڭ ۇ ب ت ناتيجەسى جارامسىز دەپ تانىلعانىن جازعان ەدىك.

سونىمەن قاتار، ۆيتسە- مينيستر «Jibek Joly» تەلەارناسىنا بەرگەن سۇحباتى بارىسىندا الماتىدا ءالى 500 ستۋدەنت ەشقايدا ورنالاستىرىلماعانىن ءمالىم ەتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى