زەينەتكەر بالالارعا ارناپ ۇزىندىعى 150 مەترلىك سىرعاناق جاسادى
بۇگىندە ونىڭ سىرعاناعى وبلىسقا عانا ەمەس، ەل اۋماعىندا تانىمال، دەپ حابارلايدى قازاقپارات ءتىلشىسى.
قىزىلجار اۋدانى بەسكول اۋىلىنىڭ 74 جاستاعى تۇرعىنى يۋري كراسنوپەر بيىك سىرعاناقتى بەسىنشى جىل قاتارىنان تۇرعىزىپ كەلەدى.
بيىل دا زەينەتكەر قىس تۇسىسىمەن ءۇيىنىڭ جانىنان ۇزىندىعى شامامەن 150 مەترگە جەتەتىن سىرعاناقتى ەشكىمنىڭ كومەگىنسىز ءوزى سالىپ شىقتى.
قازىر ول مۇنداعى قاۋىپسىزدىكتى ءوزى قاداعالايدى، ءارى سىرعاناقتى قالىپتا ۇستاپ، ماڭايىنداعى قوقىستى جينايتىن دا ءوزى.
بۇل جۇمىسى ءۇشىن ءبىر تيىن دا المايدى، سىرعاناق تەبۋ - تەگىن.
«بالالارىم ەسەيىپ، كەتتى. ءبىز زايىبىم ەكەۋىمىز عانا قالدىق. بىردە وسىنداي سىرعاناق جاساۋ ويىما كەلدى. كولدىڭ جيەگىندە تۇرعاندىقتان ىڭعايلى، جاقسى ىلدي بار. بارلىق قاجەتتى ماتەريالدى زەينەتاقىما ساتىپ الىپ، ىستەپ شىقتىم. قازىر اۋىل بالالارى ساباقتان بوس ۋاقىتتا وسى جەردەن تابىلادى. پەتروپاۆلدان ارنايى كەلەتىندەر دە بار. ءتىپتى، شەتەلدەن دە قوناقتار كەلدى. ولار كانادالىقتار، اعىلشىندار، رەسەيلىكتەر. قازاقستاننىڭ باسقا وڭىرلەرىنەن وسى جاققا قوناققا كەلگەندەر دە مۇندا سوقپاي كەتپەيدى. جۇرتقا پايدام ءتيىپ جاتقانىنا مەن دە قۋانىشتىمىن»، - دەيدى يۋري كراسنوپەر.
كوپشىلىكتىڭ كوڭىلىنەن شىققان سىرعاناقتان ءبىر مەزەتتە ەكى ادام قاتار تۇسە الادى.
بيىل زەينەتكەر ونى كەڭەيتىپ، ەكى جولاقتى ەتىپ جاساعان. ول بۇل جۇمىسقا ەكى اپتا ۋاقىتىن سارپ ەتكەن.
«ۇيدە جاتساڭ اۋىرا بەرەسىڭ، اياق-قولىڭ سىرقىرايدى، باسىڭ اۋىرادى. سول سەبەپتى مەن تاڭەرتەڭ ەرتە تۇرىپ، وسى سىرعاناققا كەلەم. بەتى تايعاناق بولۋى ءۇشىن كۇندە سۋ قۇيامىن، اينالاسىن قاردان تازارتام. ساعات 23.00-گە دەيىن سىرعاناق اشىق. حالىق كوپ. ولار كەتكەننەن كەيىن دە ماڭايدى جونگە كەلتىرۋ كەرەك. مۇندايدا مەن اۋىرعان جەرىمدى ۇمىتامىن. تازا اۋا دەنساۋلىققا جاقسى عوي. كۇنى بويى سىرعاناقتىڭ باسى بالانىڭ داۋىسى مەن كۇلكىسىنەن ايقاي- شۋ بولىپ جاتادى. وسىلايشا ولار تەلەفون مەن كومپيۋتەردى ءبىر مەزەت ۇمىتىپ، دالادا بەتتەرىنە قان جۇگىرىپ وينايدى. بۇل كەرەمەت ەمەس پە؟!»، - دەيدى يۋري كراسنوپەر.
زەينەتكەردىڭ ايتۋىنشا، سىرعاناققا كەلۋشىلەر سانى جىلدان-جىلعا ارتىپ كەلەدى. سول سەبەپتى ول كەلەسى جىلى ونى بۇدان دا ۇلكەيتىپ، ءتورت جولاقتى ەتپەك.
