ا ق ش-تا كوروناۆيرۋستان قايتىس بولعاندار سانى 150 ادامعا جەتتى

ەكى سەناتوردىڭ ۆيرۋس جۇقتىرعانى بەلگىلى بولدى. ا ق ش ساناق جۇرگىزۋ بيۋروسى ءوز جۇمىسىن توقتاتتى، ال قور بيرجاسى سارسەنبىدە تاعى وزگەرىسكە ۇشىراعان، دەپ حابارلايدى قازاقپارات USA Today-گە سىلتەمە جاساپ.

ەلدە COVID-19 ۆيرۋسىنا شالدىعىپ، قايتىس بولعانداردىڭ سانى 150 ادامعا جەتتى. ا ق ش پرەزيدەنتى دونالد ترامپتىڭ جۇمىستان شىعارىلىپ نەمەسە جالاقى ساقتالمايتىن دەمالىس الۋعا ءماجبۇر بولعان ميلليونداعان ادامعا قارجىلىق قولداۋ كورسەتۋ تۋرالى ۋادەسى سەنىم ۇيالاتادى. «جۇمىسسىز قالعان ءقوناقۇي، بار، مەيرامحانا قىزمەتكەرلەرىنە الداعى ۋاقىتتا وتەماقى تولەنەدى»، - دەپ جازدى ترامپ Twitter پاراقشاسىندا.

سارسەنبى كۇنى ترامپ سەناتتىڭ ماقۇلداۋىمەن بىرنەشە ميلليارد دوللار ءبولۋ قاراستىرىلعان امالدار پاكەتىنە قول قويدى. ول بويىنشا اۋىرىپ قالۋىنا نەمەسە وتباسىلىق جاعدايعا بايلانىستى دەمالىس العان ەل ازاماتتارى اقشا تولەنىپ، سونداي- اق كوروناۆيرۋسقا تەگىن تەكسەرىلە الادى، ال جۇمىسسىز قالعان جاعدايدا ارنايى ساقتاندىرىلادى. دجون حوپكينس ۋنيۆەرسيتەتىنىڭ مالىمەتى بويىنشا، سارسەنبى كۇنى كەشكە ا ق ش-تا كوروناۆيرۋس جۇقتىرۋدىڭ 9300 دەن استام وقيعاسى راستالدى. ءبىر اپتا بۇرىن اۋىر ىندەتتەن 33 ادام كوز جۇمدى، دەرتكە شالدىققاندار سانى 1300 ادام بولعان. دەنساۋلىق ساقتاۋ وكىلدەرى ۆيرۋستىڭ كەم دەگەندە 38 شتاتقا تاراعانىن ءمالىم ەتتى. بۇگىندە بۇكىل الەم بويىنشا ۆيرۋستان 8700 ادام قايتىس بولعان، ال اۋرۋ جۇقتىرعاندار سانى 217 مىڭنان استى. ءبىر اپتا بۇرىن كوروناۆيرۋستان 4600 ادام كوز جۇمدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى