قازاقستاندا كۇنىنە 150 ادام قان وتكىزەدى
دەپ حابارلايدى «قازاقپارات» ح ا ا ءتىلشىسى.
«ەكى سەكۋند وتكەن سايىن الەمدە ءبىر ادام قان قۇيۋعا مۇقتاج بولىپ وتىرادى. سوندىقتان، بىزگە قان وتكىزۋگە كەلگەن ادامداردىڭ سانىنا قاراي مۇقتاج ادامدارعا قان كومپونەتتەرىن جەتكىزەمىز. البەتتە، سوڭعى ۋاقىتتا قايتارىمسىز قان وتكىزۋشىلەردىڭ سانى ارتىپ كەلە جاتقانىن اتاپ وتۋگە بولادى. وتكەن عاسىردىڭ توقسانىنشى جىلدارى اقىلى قان وتكىزۋشىلەر كوبەيىپ كەتسە، قازىرگى تاڭدا قازاقستاندا قان وتكىزۋشىلەردىڭ 95 پايىزى قايتارىمسىز وتكىزەدى. بۇل قۋانتارلىق جاعداي. وسى كورسەتكىشتى ساقتاپ قالۋ ءۇشىن ءبىزدىڭ ماماندار ب ا ق، الەۋمەتتىك جەلىلەر، اكسيالار مەن قان وتكىزۋ شارالارى ارقىلى اۋقىمدى تۇردە تۇسىندىرمە جۇمىستارىن جۇرگىزىپ كەلەدى»، - دەيدى ول.
شايجامال مۇسابەكوۆانىڭ سوزىنە قاراعاندا، قازاقستاندا كۇنىنە 150 دونور قان وتكىزەدى.
«دونورلار قان وتكىزگەننەن كەيىن ەكى كۇن جۇمىستان بوساتۋ تۋرالى انىقتاما جانە ەنەرگيالىق قۋاتىن قالپىنا كەلتىرۋ ءۇشىن ەڭ تومەنگى كۇنكورىس دەڭگەيىنىڭ 0,25 پايىزىنداي اقشا تۇرىندە مەملەكەتتىك كەپىلدەندىرۋ الادى. بۇل 600 تەڭگە عانا. دەسە دە، الەمدىك تاجىريبەدە قايتارىمسىز دونورلىق ءۇشىن ەشقانداي اقشا تولەنبەيدى»، - دەدى ول.
ورتالىق وكىلى ايتىپ وتكەندەي، دونورلار نەعۇرلىم كوپ كەلگەن سايىن الىناتىن قان كومپونەنتتەرى سوعۇرلىم قاۋىپسىز بولا تۇسەدى
«ءبىز دونورلار ءبىر رەت كەلىپ قايتىپ كەتپەيتىندەي جۇمىس جۇرگىزۋگە تىرىسامىز. ايتا كەتەرلىگى، قازىرگى ۋاقىتتا جاستار قان وتكىزۋگە كوپتەپ دەن قويىپ كەلەدى. ەگەر الەۋمەتتىك جەلىدە قاننىڭ شۇعىل كەرەكتىگىن ەستىپ قالىپ جاتسا، جاستارىمىز بىردەن قان وتكىزۋگە ءازىر تۇرادى. ءبىراق، بىزگە اناعۇرلىم كوپ مولشەردە قاننىڭ قاجەتتىلىگى جوق ەكەنىن اتاپ وتكىمىز كەلەدى. ءبىز تەك ءوتىنىم بويىنشا جۇمىس اتقارامىز. سەبەبى، ءاربىر قان كومپونەنتىنىڭ جارامدىلىق مەرزىمى بار»، - دەپ ءتۇيدى شايجامال مۇسابەكوۆا.
اۆتور: ايان بەكەن ۇلى
