ۇلتتىق مۋزەيدە ءاليحان بوكەيحاننىڭ 150 جىلدىعىنا ارنالعان كونفەرەنسيا ءوتتى
شاراعا ەلىمىزگە بەلگىلى عالىمدار - مامبەت قويگەلدى، تۇرسىن جۇرتباي، ايگۇل ءىسىماقوۆا، سۇلتانحان اقق ۇلى، ديحان قامزابەك ۇلى، ەربول تىلەشوۆ، شەرۋباي قۇرمانباي ۇلى، بەرىك ءابدىعالي، قايرات ساق، جاندوس سماعۇلوۆ ت. ب. قالامگەرلەر، زيالىلار، ءتىل جاناشىرلارى، دەپۋتاتتار، مەكەمە باسشىلارى، تاريحشىلار مەن ادەبيەتشىلەر، ماگيسترانتتار مەن ستۋدەنتتەر قاتىستى.
سونداي-اق، اتالمىش شاراعا الاش كوسەمى ءاليحان بوكەيحاننىڭ تۋعان توپىراعى - اقتوعاي جەرىنەن اۋدان اكىمى باستاعان ءبىر توپ دەلەگاتتار كەلدى. ولاردىڭ ىشىندە ۇلى تۇلعانىڭ اۋلەتىنىڭ ۇرپاقتارى، جاقىن تۋىستارى دا بار. كونفەرەنتسياعا قاتىسۋشىلار ءاليحان بوكەيحاننىڭ تاۋەلسىزدىككە باستاۋ بولعان يدەيالارىن، الاش قوزعالىسىن، ءا. بوكەيحاننىڭ شىعارماشىلىعىن، اۋدارما ىسىنە قوسقان ۇلەسىن تاقىرىپ ەتىپ الىپ، جان- جاقتى باياندامالار جاسادى. ل. ن. گۋميلەۆ اتىنداعى ە ۇ ۋ جانىنداعى «الاش» مادەنيەت جانە رۋحاني دامۋ ينستيتۋتىنىڭ ديرەكتورى سۇلتانحان اققۇلى ءاليحاننىڭ وسى كۇنگە دەيىن بەلگىسىز بولىپ كەلگەن قىرلارىن ء«بىز تانىمايتىن ءاليحان» اتتى بايانداماسىندا ءسوز ەتتى. كونفەرەنسيا بارىسىندا، سونىمەن قاتار، سۇلتانحان اقق ۇلىنىڭ اۆتورلىعىمەن شىققان ءاليحاننىڭ ءومىرى مەن سان قىرلى قىزمەتى تۋرالى قازاق جانە ورىس تىلدەرىندەگى 2 تومنان تۇراتىن ەڭ العاشقى 2 كىتاپ - قازاقشا «ءاليحان بوكەيحان. قازاق جەرىنىڭ جوقشىسى»، «ءاليحان بوكەيحان. امانات»، ورىسشا «اليحان بۋكەيحان. تۆورەتس يستوري» جانە «اليحان بۋكەيحان. زاۆەشانيە» اتتى قوس مونوگرافيانىڭ تۇساۋى كەسىلدى.
ۇ ع ا كوررەسپوندەنت- مۇشەسى فيلولوگيا عىلىمىنىڭ دوكتورى، پروفەسسور ديحان قامزابەك ۇلى: «ءاليحاننىڭ ءاربىر ءسوزى، ءاربىر ويى ۇلتقا، قازاقتىڭ تاۋەلسىزدىگىنە ارنالعان. بۇل بەكەر ەمەس. سەبەبى، الاش ارىستارىنىڭ بارلىعى نامىستىڭ قايناۋىنان شىققان، ەلدىڭ جوعىن جوقتاپ شىققان، ءاربىر سوزىندە ۇلتتىق جاۋاپكەرشىلىك بولعان. سونىمەن قاتار جوعارىدا اتالعانداردىڭ بارلىعى ولاردىڭ كوكەيىندە تۇرعان. ناتيجەسىندە قاعازعا دا سولاي ءتۇستى. سوندىقتان ءبىز ءاليحاننىڭ ەڭبەگىن وقىعاندا تاڭ قالامىز. وسىنشاما ەلگە دەگەن، ۇلتقا دەگەن ادالدىق بولادى ەكەن عوي دەگەن وي كەلەدى»، - دەپ، ءاليحان بوكەيحاننىڭ ۇلتجاندىلىعىن تىلگە تيەك ەتتى.
كونفەرەنسيانىڭ ماقساتى - كورنەكتى قوعام جانە مەملەكەت قايراتكەرى، ۇلت- ازاتتىق قوزعالىسىنىڭ نەگىزىن سالۋشى جانە الاش قوزعالىسىنىڭ جەتەكشىسى، الاشوردا اۆتونوميالى ۇكىمەتىنىڭ ءتوراعاسى، پۋبليتسيست، عۇلاما عالىم ءارى شەبەر اۋدارماشى - ءاليحان بوكەيحاننىڭ ءومىرى مەن قوعامداعى ءرولىن، قىزمەتىن جان- جاقتى تەرەڭ زەرتتەۋ، تانۋ، تانىتۋ، كەلەشەك جاس ۇرپاققا ناسيحاتتاۋ. «الاش» ۇلت- ازاتتىق قوزعالىسى مەن ەلىمىزدىڭ تاۋەلسىزدىك الۋىنا ولشەۋسىز ۇلەس قوسقان، تۋعان ەلىن تاۋەلسىزدىك مۇراتىنا ۇيىستىرا بىلگەن قوزعالىس كوشباسشىلارىنىڭ مۇراسىن تاراتۋ مەن قالىڭ كوپشىلىككە دارىپتەۋ.
ازاتتىقتى اڭساعان، سول جولدا قىزمەت اتقارعان كۇرەسكەر بابالارىمىزدىڭ ۇلى مۇراتى ەل پرەزيدەنتى نۇرسۇلتان نازاربايەۆتىڭ تۇسىندا جۇزەگە اسقانىن، ەلباسى العا تارتقان «ماڭگىلىك ەل» يدەياسى «الاشتىڭ» نەگىزگى ۇستانىمى - قازاق بوستاندىعىمەن تىعىز ۇندەسىپ جاتقانىن كوپشىلىككە جەتكىزۋ.
