اقمولا وبلىسىندا جىلىنا 150 ميلليون جۇمىرتقا وندىرەتىن تاعى ءبىر قۇس فابريكاسى سالىنۋدا

 بۇل جولى ۇدەمەلى يندۋستريالدىق- يننوۆاتسيالىق دامۋ باعدارلاماسى بويىنشا قۇنى 2,3 ميلليارد تەڭگەگە باعالانعان جوبانى اعىمداعى جىلدىڭ جەلتوقسان ايىندا ىسكە قوسۋ جوسپارلانعان.

مۇنداعى قارجىنىڭ نەگىزگى بولىگى اتالعان باعدارلاما ارقىلى بولىنسە، قالعان 20 پايىزىن سەرىكتەستىك ءوزى قوسادى. قازىر قۇرىلىس جۇمىستارىنىڭ 45 پايىزى ورىندالىپ، ەكى كورپۋس تاپسىرىلدى. جاڭا فابريكادا قازىردىڭ وزىندە 150 مىڭ تاۋىق بار. سەرىكتەستىك باسشىلارى ءبىر تاۋلىكتىك سارى اۋىز بالاپانداردى رەسەيدەن جەتكىزەمىز دەپ وتىر.

«ءبىز اسىل تۇقىمدى تاۋىق بالاپاندارىن نەگىزىنەن رەسەيدىڭ سۆەردلوۆسك قالاسىنان اكەلەمىز. بۇل تاۋىقتار كوپ جۇمىرتقالاۋىمەن ەرەكشەلەنەدى. بۇل كۇندە فابريكانىڭ ءونىمى استانا، الماتى جانە قاراعاندى قالالارى حالقىنىڭ قاجەتىن وتەۋدە. اسىرەسە، «قازگەرلىكتەر» ەلوردا تۇرعىندارى ءۇشىن اي سايىن 600 مىڭ دانا جۇمىرتقا جەتكىزىپ بەرىپ وتىر. جاڭا قۇس فابريكاسى ىسكە قوسىلعان كەزدە ءوندىرىس كولەمىن تاعى 150 ميلليون جۇمىرتقاعا ارتاتىن بولادى» ، - دەيدى سەرىكتەستىكتىڭ باس ديرەكتورى بوريس وزدويەۆ.

ەسكە سالا كەتسەك، بۇگىنگى تاڭدا ەلىمىزگە جۇمىرتقا وندىرۋمەن تانىمال «قازگەرقۇس» جاۋاپكەرشىلىگى شەكتەۋلى سەرىكتەستىگى ءونىم كولەمى جاعىنان الدىڭعى قاتاردان كورىنۋدە. مۇنداعى العاشقى قۇس فابريكاسى وسىدان 6 جىل بۇرىن، ياعني، 2008 - جىلى ىسكە قوسىلعان بولاتىن. سودان بەرى سەرىكتەستىك جىلىنا 150 ميلليون دانا جۇمىرتقا شىعارۋدا. قازىر مۇندا 140 جەرگىلىكتى تۇرعىن تۇراقتى جۇمىسپەن قامتىلعان. فابريكاداعى بارلىق جۇمىس جۇيەسى اۆتوماتتاندىرىلعان، قول كۇشىن كوپ قاجەت ەتپەيدى. وسىلايشا سەرىكتەستىك حالىقتى ساپالى ازىق- تۇلىكپەن قامتاماسىز ەتۋدە قىرۋار ءىس تىندىرىپ وتىر.

  اۆتور: اسلان وسپانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى