اقمولا وبلىسىندا 1500 دومبىراشى ءبىر مەزەتتە كۇي تارتتى - فوتو
اقمولا وبلىسىنىڭ مادەنيەت باسقارماسى باسپا ءسوز قىزمەتىنىڭ مالىمەتىنشە، وبلىستىق حالىق شىعارماشىلىعى جانە مادەني دەمالىس ورتالىعىنىڭ ۇيىمداستىرۋىمەن دومبىرا كۇنىنە جانە قازاقتىڭ ۇلى كۇيشى-كومپوزيتورى قۇرمانعازى ساعىرباي ۇلىنىڭ 205 جىلدىعىنا ارنالعان «كۇمبىرلەگەن كۇمىس كۇي» اتتى وبلىستىق بايقاۋ وتكەن.
ەكى كەزەڭنەن قۇرالعان بايقاۋعا اقكول، استراحان، اتباسار، بۇلاندى، بۋراباي، جاقسى، زەرەندى، قورعالجىن، شورتاندى اۋداندارى مەن ستەپنوگورسك، قوسشى جانە كوكشەتاۋ قالالارىنان بارلىعى 18-35 جاس ارالىعىنداعى 20-دان استام كۇيشى قاتىستى.
«2-شىلدە - ۇلتتىق دومبىرا كۇنىنە وراي كوكشەتاۋ قالاسىنداعى ابىلاي حان الاڭىندا 1,5 مىڭ ونەرپازداردىڭ قاتىسۋىمەن «دومبىرا» اتتى فلەش-موب ءوتتى. وندا وبلىسىمىزدىڭ كاسىبي دومبىراشىلارى، ۇكىلى ىبىراي اتىنداعى اقمولا وبلىستىق فيلارمونياسىنىڭ ك. كۇمىسبەكوۆ اتىنداعى قازاق ۇلتتىق اسپاپتار وركەسترى، كوكشەتاۋ قالاسىنىڭ ءبىرجان سال اتىنداعى مۋزىكالىق كوللەدجى، اقان سەرى اتىنداعى جوعارى مادەنيەت كوللەدجىنىڭ، قالا مەكتەپتەرىنىڭ، اقكول، بۋراباي، اتباسار، ەگىندىكول، جاقسى، سەلينوگراد، ساندىقتاۋ، قورعالجىن، بۇلاندى، شورتاندى، زەرەندى اۋداندارى مەن كوكشەتاۋ، قوسشى قالاسىنىڭ بىرلەسكەن دومبىراشىلار انسامبلى مەن كۇي مەكتەبىنىڭ شاكىرتتەرى بىرلەسىپ، قازاق حالىق كومپوزيتورلارىنىڭ كۇيلەرىن ءبىر مەزەتتە ورىندادى»، - دەدى باسقارمانىڭ باسپا ءسوز قىزمەتىنەن.
ۇيىمداستىرۋشىلاردىڭ ايتۋىنشا، اۋقىمدى ونەر مەرەكەسىنە كوكشەتاۋ («دانياروۆا» ج ك، «كاليەۆا ب. ا.» ج ك، «گۋلبانۋ گۋمۋرزاكوۆا» ج ك)، قوسشى («ونەر-2012» ج ك) قالالارى، قوياندى («راحيم» ج ك، «نۇريسلام» ج ك)، وركەندەۋ («ادال نيەت استانا») ەلدى مەكەندەرىنىڭ مەملەكەتتىك شىعارماشىلىق تاپسىرىس اياسىندا قىزمەت كورسەتەتىن دومبىرا مەكتەپتەرى مەن ۇيىرمەلەرى دە بەلسەندى اتسالىستى.
