قازاقستان 1500 دەن استام شەتەلدىك جۇمىس كۇشىنە رۇقسات بەرۋدەن باس تارتتى
بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ۇكىمەت ۇيىندەگى باسپا ءسوز ءماسليحاتىندا ايتتى، دەپ حابارلايدى قازاقپارات ءتىلشىسى.
ءمينيستردىڭ ايتۋىنشا، الەمدى شارپىعان كوروناۆيرۋسقا بايلانىستى ەلىمىزدە جۇمىس ىستەپ جۇرگەن شەتەلدىك جۇمىس كۇشتەرى كۇندەلىكتى باقىلاۋعا الىنعان.
«بۇگىندە ەلىمىزدە بىلتىر كەلگەن 19 مىڭنان استام شەتەلدىك ازامات رۇقساتى بويىنشا جۇمىس ىستەپ جاتىر. سونىڭ ىشىندە 1, 2, 3 ساناتقا كىرەتىن مەملەكەتتەردىڭ بۇرىننان جۇمىس ىستەپ كەلە جاتقان 7260 وكىلى بار. ال اقپان ايىندا ەلىمىزدەن جۇمىس كۇشى رەتىندە رۇقسات الماق بولىپ وتىرعان 1543 شەتەلدىك بولعان ەدى. ولارعا رۇقسات ەندى بەرىلمەيدى. اتالعان ءۇش ساناتقا كىرەتىن ەلدەردىڭ ازاماتتارىنا رۇقسات بەرۋ توقتاتىلدى. ەلىمىزدە جۇمىس ىستەپ جۇرگەن اتالعان ءۇش ساناتقا كىرەتىن مەملەكەتتىڭ 7 مىڭنان استام ازاماتى ۇيلەرىنە بارىپ كەلەمىن دەسە، وندا قايتادان قازاقستانعا كىرە المايدى. سونداي تالاپ قويىلىپ وتىر»، - دەدى ءبىرجان نۇرىمبەتوۆ.
ايتا كەتەيىك، تاياۋدا قازاقستان باس سانيتارلىق دارىگەرىنىڭ ەلدە كوروناۆيرۋس ينفەكتسياسىنىڭ الدىن الۋ شارالارىن كۇشەيتۋ بويىنشا قاۋلىسى جاريالانعان بولاتىن. وندا كوروناۆيرۋس كەلۋى مۇمكىن قاۋىپتى ەلدەر 3 ساناتقا بولىنگەن.
