قىتايدا تىيىم سالىنعان ءدىني سەكتالاردىڭ 1500 مۇشەسى تۇتقىندالدى
دەپ حابارلادى سەيسەنبى كۇنى قىتاي پوليسياسىنىڭ وكىلدەرى.
قىتايدىڭ سولتۇستىك- باتىسىنداعى مۇسىلماندار باسىم تۇراتىن نيڭشيا- حۇيزۋ اۆتونوميالىق ولكەسىندە 2012 - جىلدان بەرى «قۇدىرەتتى قۇداي» سەكتاسىنىڭ 800 مۇشەسى جانە تىيىم سالىنعان «Disciples Sect» سەكتاسىنىڭ 580 جاماعاتى تۇتقىندالعان.
ءدىني سەكتالاردىڭ 1200دەن استام مۇشەسى اكىمشىلىك جاۋاپكەرشىلىككە تارتىلىپ، 87 مۇشەسىنە ايىپتاۋ تاعىلعان، 59 ى - تۇرمەگە وتىرعىزىلعان.
سولتۇستىك قىتايلىق لياۋنيڭ پروۆينتسياسىندا 2013 -جىلدان بەرى «قۇدىرەتتى قۇداي» سەكتاسىنىڭ 113 جاماعاتى تۇتقىندالىپ، ولاردىڭ 20 سى تۇرمەگە جابىلعان.
ەسكە سالا كەتەيىك، 2014 - جىلعى مامىرداعى «قۇدىرەتتى قۇداي» سەكتاسىنىڭ قىزمەتىمەن بايلانىستى قايعىلى وقيعا قىتاي قوعامىن ءدۇر سىلكىندىردى. وسى سەكتانىڭ جاقتاۋشىلارى شاندۇڭ پروۆينتسياسىنداعى «ماكدونالدس» مەيرامحانالارىنىڭ بىرىندە جۇرتتىڭ كوزىنشە ايەل ادامدى ولتىرگەن. وعان قۇربان بولعان ايەلدىڭ «قۇدىرەتتى قۇداي» سەكتاسى مۇشەلەرىنە ءوزىنىڭ بايلانىس مالىمەتتەرىن بەرۋدەن جانە وسى اتالعان ءدىني قوعامعا كىرۋدەن باس تارتۋى سەبەپ بولعان.
قىتايدا «قۇدىرەتتى قۇداي» سەكتاسى 90- جىلداردىڭ باسىنان پايدا بولعان، ونىڭ نەگىزىن قالاۋشى - چجاو ۆەيشەن. سەكتا جاماعاتتارى قىتايدا «اقىرزامان» تۋرالى سىبىس تاراتقان. 1998 - جىلدىڭ كۇزىندە جەرگىلىكتى حالىقتى توناپ، زومبىلىق كورسەتكەن. 2000 - جىلى سەكتانىڭ نەگىزىن قالاۋشى چجاو ۆەيشەن ا ق ش- قا كەتىپ، ساياسي باسپانا الدى. كەيىننەن ول ا ق ش- تا سەكتانىڭ شتاب- پاتەرىن اشتى.
