15 ميلليون تەڭگەنىڭ جالعان «Apple» ونىمدەرى تاركىلەندى
ەلىمىزدە 15 ميلليون تەڭگەنىڭ جالعان «Apple» ونىمدەرى تاركىلەندى. بۇل تۋرالى ادىلەت مينيسترلىگىنىڭ رەسمي وكىلى تالعات ءۋالي ايتتى، دەپ حابارلايدى Kazinform.
اۋماقتىق ادىلەت ورگاندارى زياتكەرلىك مەنشىك سالاسىنداعى قۇقىق بۇزۋشىلىقتاردىڭ جولىن كەسۋ جۇمىسىن جالعاستىرىپ جاتىر. تەكسەرۋلەر قۇقىق يەلەنۋشىلەردىڭ وتىنىشتەرى نەگىزىندە جۇرگىزىلەدى. ازاماتتىق اينالىمنان الىناتىن كونترافاكتىلىك ونىمدەردىڭ ءتىزىمى وتە كەڭ. بۇل - كيىم، تۇرمىستىق حيميا، اۆتوموبيلدەرگە ارنالعان قوسالقى بولشەكتەر، گادجەتتەردىڭ بارلىق تۇرلەرى. ءتىپتى تاماق ونىمدەرى دە تاركىلەنە. «Chanell» «Apple» «ZEPTER» «Levi`s» «Louis Vuitton» ، «LEGO» ،«PUMA» ،«TOYOTA/LEXUS»، «ناۋرىز»، «اسسام»، «Prachka» سياقتى تاۋار بەلگىلەرى يەلەرىنىڭ قۇقىقتارى قورعالعان» ، - دەدى مينيسترلىك وكىلى اپتالىق بريفينگ بارىسىندا.
ونىڭ اتاپ وتۋىنشە، تەك «Apple» كومپانياسىنىڭ ءوتىنىشى بويىنشا 30 تەكسەرۋ ءىس- شاراسى وتكىزىلگەن.
«تەكسەرۋ قورىتىندىسى بويىنشا بارلىق تۇلعا اكىمشىلىك جاۋاپكەرشىلىككە تارتىلدى. 15 ميلليون تەڭگەدەن استام سوماعا 9662 بىرلىك قۇلاققاپتار، سمارت- ساعاتتار، قۋاتتاۋ قۇرىلعىلارى، سىمدار، ۇيالى تەلەفوندارعا ارنالعان اكسەسسۋارلار سىندى جالعان ونىمدەر تاركىلەندى» ، - دەدى ول.
تالعات ءۋاليدىڭ دەرەگىنشە، الماتى قالالىق ادىلەت دەپارتامەنتى شامامەن 1,6 ميلليون تەڭگە سوماسىنا 4076 بىرلىك مولشەرىندە «APPLe»، «Phone» تاۋار بەلگىسىنىڭ زاڭسىز بەينەسى بار كونترافاكتىلىك ءونىمدى تاركىلەدى. تاركىلەنگەن ونىمدەر الماتى قالاسىنىڭ اكىمشىلىك قۇقىق بۇزۋشىلىق جونىندەگى مامانداندىرىلعان اۋدانارالىق سوتىنىڭ قاۋلىسىنا سايكەس جويىلدى. كىنالى تۇلعاعا ايىپپۇل سالىندى.
«اكىمشىلىك قۇقىق بۇزۋشىلىق تۋرالى» كودەكستىڭ «بوتەن تاۋار بەلگىسىن، قىزمەت كورسەتۋ بەلگىسىن، تاۋار شىعارىلعان جەردىڭ اتاۋىن نەمەسە فيرمالىق اتاۋدى زاڭسىز پايدالانۋ» 158-بابى بويىنشا اكىمشىلىك جاۋاپكەرشىلىككە 74 ادام تارتىلىپ، ايىپپۇلداردىڭ جالپى سوماسى شامامەن 6 ميلليون تەڭگەنى قۇرادى. جىلدىڭ باسىنان بەرى ادىلەت ورگاندارى بوتەن تاۋار تاڭباسىن زاڭسىز پايدالانۋدىڭ 92 فاكتىسىن انىقتاپ، ازاماتتىق اينالىمنان 45 ميلليون تەڭگەدەن استام سوماعا 24 مىڭعا جۋىق كونترافاكتىلىك ءونىم تاركىلەندى» ، - دەدى رەسمي وكىل.
