15 جاسار وقۋشى «شاحمات كەرۋەنى» تۋرنيرىنىڭ فينالىنا جولداما الدى
ەكى اي ىشىندە ەلىمىزدىڭ بارلىق ايماعىن ارالاپ شىعاتىن «شاحمات كەرۋەنى» رەسپۋبليكا كۇنىندە باتىس قازاقستان وبلىسىنداعى ۇزدىكتەردى انىقتادى، دەپ حابارلايدى Kazinform.
تۇڭعىش پرەزيدەنت الاڭىندا ۇيىمداستىرىلعان مەرەكەلىك شارا كەزىندە قازاقستان شاحمات فەدەراتسياسىنىڭ وبلىستىق فيليالى اشىلىپ، ونىڭ ءتوراعالىعىنا ورال قالاسىنىڭ اكىمى ميرجان ساتقانوۆ تاعايىندالدى.
جارىستىڭ اشىلۋ سالتاناتىندا ءسوز سويلەگەن ب ق و اكىمى ناريمان تورەعاليەۆ ەلىمىزدە 900 گە جۋىق ادام شاحماتتان حالىقارالىق رەيتينگكە يە بولسا، ونىڭ 15 ى گروسسمەيستەر اتاعىن العانىن جەتكىزدى.
«وبلىسىمىزدا 9 مىڭعا جۋىق ادام تۇراقتى تۇردە شاحماتپەن اينالىسادى. 500 گە جۋىق بالا شاحمات سەكسيالارىنا قاتىسسا، ولارعا باعىت بەرەتىن 20 بىلىكتى جاتتىقتىرۋشى بار. جىل سايىن شاحماتتان اۋداندىق، وبلىستىق تۋرنيرلەر ۇيىمداستىرىلادى. بۇگىندە ينتەللەكتۋالدى ويىنعا ۇلكەن قىزىعۋشىلىق تانىتىپ، شاحمات سەكتسيالارىنا جازىلعىسى كەلەتىن بالالاردىڭ سانى ارتىپ كەلەدى»، - دەدى ءوڭىر باسشىسى.
مەرەكەلىك ءىس- شارادان سوڭ ءموبيلدى كيىز ۇيدە شۆەيتسارلىق جۇيە بويىنشا 11 كەزەڭنەن تۇراتىن بليتستەن تۋرنير بولدى. وندا وبلىستىق ىرىكتەۋدەن وتكەن 20 ادام ءوزارا باق سىناسىپ، ءۇش جەڭىمپاز 10-قاراشادا تۇركىستاندا بولاتىن گراند- فينالعا جولداما الدى.
1-ورىن - تورەحان مولباي (100 مىڭ تەڭگە) ؛
2-ورىن - دميتري دانيلوۆ (50 مىڭ تەڭگە)؛
3-ورىن - ميراس رۋشانوۆ (30 مىڭ تەڭگە).
«فريدوم فينانس» ا ق- نىڭ ورالداعى فيليالىنىڭ ديرەكتورى باۋىرجان مۇحامبەتوۆ فيناليستەردىڭ جولاقىسى مەن سىياقىلارى كومپانيا اتىنان قارجىلاناتىنىن ايتتى.
«شاحماتتى 4 جاسىمدا اكەمنەن ۇيرەندىم. 8 جىلدان بەرى تۇراقتى اينالىسىپ كەلەمىن. بۇگىن تۋرنيردە وبلىستىڭ 20 مىقتىسىمەن ويناپ، ءى ورىن يەلەندىم. ءوزىمنىڭ جەتكەن جەتىستىگىمە قۋانىپ تۇرمىن»، - دەدى 15 جاسار تورەحان مولباي.
سونداي- اق تۋرنيرگە قاتىسقان ايشا تۇرسىنوۆا «قىزدار اراسىنداعى ۇزدىك كورسەتكىش»، بەكسۇلتان عۇباشيەۆ «16 جاسقا دەيىنگى ۇزدىك ويىنشى» جانە تايىر جۇمابايەۆ «50 جاستان اسقان ارداگەر قاتىسۋشى» اتالىمدارى بويىنشا ماراپاتتالىپ، ءارقايسىسىنا 30 مىڭ تەڭگەدەن اقشالاي سىيلىقتار تابىس ەتىلدى.
ماراپاتتاۋدان كەيىن الدىن الا تىركەلگەن 10 اۋەسقوي ويىنشى شاحمات وليمپيادالارىنىڭ جەڭىمپازى، قازاقستان چەمپيونى رومان كوزلوۆپەن ءبىر مەزەتتىك ويىن سەانسىنا قاتىستى.
ايتا كەتەيىك، «شاحمات كەرۋەنى»- قازاقستان شاحمات فەدەراتسياسىنىڭ وڭىرلەردەگى ينتەللەكتۋالدى سپورت ءتۇرىن دامىتۋ ءۇشىن قولعا العان جوباسى.
ۇلتتىڭ زياتكەر ۇرپاعىن قالىپتاستىرۋدى ماقسات ەتكەن جوباعا Freedom Broker كومپانياسى باس دەمەۋشىلىك جاساپ وتىر. 10 قاراشادا ءار وبلىستىڭ ۇزدىك 60 ويىنشىسى قاتىساتىن گراند- فينالدىڭ جەڭىمپازى 5 ميلليون تەڭگەنى ءوز قانجىعاسىنا بايلايدى.
ال كەرۋەننىڭ جالپى جۇلدە قورى - 16 ميلليون تەڭگە.
