اتىراۋدا 15 مىڭعا جۋىق كورەرمەن جينالعان كونسەرتتە 120 بالا جوعالعان
كەشە، 27- تامىزدا اتىراۋ قالاسىنداعى «يساتاي-ماحامبەت» ورتالىق الاڭىندا وتكەن وتاندىق ەسترادا جۇلدىزدارىنىڭ گالا-كونسەرتىن تاماشالاۋعا 15 مىڭعا جۋىق كورەرمەن جينالدى. ساعات 19:00-00:00 ارالىعىندا قويىلعان كونسەرت كەزىندە قوعامدىق ءتارتىپ پەن تىنىشتىقتى اتىراۋ قالالىق پوليتسيا باسقارماسىنىڭ قىزمەتكەرلەرى قامتامىز ەتتى. پوليتسيا قىزمەتكەرلەرىنە «الاڭدا بالا جوعالدى» دەگەن دەرەكپەن 120 عا جۋىق ارىز تۇسكەن.
«كونسەرتتى تاماشالاۋ ءۇشىن الاڭعا ادام كوپ جينالدى. بۇل اتا-انالاردىڭ بالالارىنان كوز جازىپ قالۋىنا اسەر ەتتى. پوليتسيا قىزمەتكەرلەرى جوعالعان بالالاردىڭ ءبارىن 15 مينۋت پەن 1 ساعاتتىڭ ارالىعىندا تاۋىپ، اتا-انالارىنا امان-ەسەن تاپسىردى. ال، 6 بالانىڭ اتا-اناسىنىڭ موبيلدى تەلەفونى ءوشىپ تۇردى. سوعان بايلانىستى پوليتسيا قىزمەتكەرلەرى بالالاردى مەكەنجايى بويىنشا ۇيلەرىنە جەتكىزدى»، - دەپ ءمالىم ەتتى اتىراۋ قالالىق پوليتسيا باسقارماسى باستىعىنىڭ ءبىرىنشى ورىنباسارى ءانۋار كوكالوۆ.
ەسكە سالا كەتەلىك، بۇدان بۇرىن اتىراۋدا 1,5 جاسار بالا كولىكتىڭ سالونىندا كىلتتەنىپ قالعانىن جازعان ەدىك.
بالانىڭ اناسى كولىكتىڭ كىلتىن سالوندا قالدىرعان. اۆتوموبيلدە وتىرعان ءسابي ەسىكتىڭ ىشتەن جابىلاتىن تەتىگىن باسىپ، كەرى اشا الماي قالعان.
قۇتقارۋشىلار كولىكتىڭ ەسىگىن اۆاريالىق-قۇتقارۋ قۇرالدارىنىڭ كومەگىمەن اشتى. بالا امان-ەسەن اناسىنا تاپسىرىلدى. دەنساۋلىعى جاقسى بولعاندىقتان، مەديتسينالىق كومەكتى قاجەت ەتپەدى.
