ەلوردادا پوليتسيا ينتەرنەت ارقىلى قىلمىس جاسادى دەگەن كۇدىكپەن 14 ادامدى ۇستادى

باسپا ءسوز قىزمەتىنىڭ مالىمەتتەرىنە قاراعاندا، اقپاراتتىق تەحنولوگيالاردى پايدالانا وتىرىپ جاسالعان قىلمىستىق قۇقىق بۇزۋشىلىقتارمەن كۇرەس تيىمدىلىگىن ارتتىرۋ ماقساتىندا نۇر-سۇلتان قالاسىنىڭ اۋماعىندا «Anti-Fraud» جەدەل الدىن الۋ شاراسى ۇيىمداستىرىلعان. ول ءۇشىن دەپارتامەنتتىڭ ەڭ تاجىريبەلى قىزمەتكەرلەرىنەن ارنايى توپ قۇرىلىپ، ءۇش كۇندە ءتارتىپ ساقشىلارى ينتەرنەت جەلىسىندە 50 گە جۋىق قىلمىستىڭ بەتىن اشقان. ينتەرنەت- الاياقتىقتىڭ 29 فاكتىسى جانە 7 ينتەرنەت ارقىلى جاسالعان ۇرلىق انىقتالدى. ىزدەستىرۋ شارالارى بارىسىندا پوليتسيا ينتەرنەت جەلىسىندە قىلمىس جاساعان 14 كۇدىكتىنى قولعا ءتۇسىردى.

40 جاستاعى ەر ادام ۇستالدى. ونىڭ ونلاين الاياقتىقتىڭ 40 تان استام فاكتىسىنە قاتىسى بار ەكەنى دالەلدەندى. ەر ادام اقپاراتتى زاڭسىز جيناۋ ارقىلى ق ر ازاماتتارىنىڭ جەكە مالىمەتتەرىن الىپ، ولاردى پايدالانا وتىرىپ، اقپاراتتىق تەحنولوگيالاردىڭ كومەگىمەن نەسيە راسىمدەيتىن بولعان. قازىرگى ۋاقىتتا ەر ادام قاماۋعا الىنىپ، تەرگەۋ امالدارى جۇرگىزىلۋدە.

سونداي-اق، 20-تامىزدا پوليتسيا ازاماتتارعا بانكتەردەن ۇلكەن مولشەردە نەسيە الۋعا ۋادە بەرگەن 31 جاستاعى ەلوردا تۇرعىنىن ۇستادى. بانكتەردەن نەسيە الا الماعان كوپتەگەن قالا تۇرعىندارى ينتەرنەتتەگى دەلدالدارعا جۇگىنەدى. بەس قالا تۇرعىنىن الداعان كۇدىكتى دە ءدال وسىنداي دەلدال بولىپ شىقتى.

الاياق ءوزىنىڭ «قىزمەتى» ءۇشىن الدىن- الا تولەم تالاپ ەتىپ، qiwi ءاميانىنا اقشا اۋدارتىپ، جەلىدەگى جارنامالارى مەن تەلەفون نومىرلەرىن ءوشىرىپ تاستاعان. قازىرگى تاڭدا وسى ارەكەت بويىنشا سوتقا دەيىنگى تەرگەۋ ءجۇرىپ جاتىر.

اۆتور: اياۋلىم التىنبەك

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى