قازاقستان اسكەري قۋاتى بويىنشا الەمدىك رەيتينگىدە 145 ەلدىڭ ىشىندە 63-ورىندا تۇر

Finprom.kz پورتالىنىڭ جازۋىنشا، Global Firepower- ءدىڭ اسكەري قۋاتى بويىنشا رەيتينگىندە قازاقستان 145 ەلدىڭ ىشىندە 63-ورىندا تۇر. ەلدىڭ يندەكسى - 1,0873. كورسەتكىش نەعۇرلىم جوعارى بولسا، مەملەكەتتىڭ اسكەري قۋاتى سوعۇرلىم جوعارى دەگەندى بىلدىرەدى.

رەيتينگ ساراپشىلارى 60 ءتۇرلى فاكتوردى باعالايدى. ونىڭ ىشىندە قورعانىس شىعىندارىنىڭ دەڭگەيى، تەحنيكا مەن قۇرىلعىنىڭ ارسەنالى، اسكەردىڭ كولەمى، تانكتەردىڭ، كەمەلەردىڭ، ۇشاقتاردىڭ جانە باسقا دا اسكەري تەحنيكالاردىڭ سانى، مۇناي، كومىر جانە باسقا رەسۋرستارعا قولجەتىمدىلىك قاپەرگە الىنادى. بۇل رەتتە يادرولىق قارۋدىڭ بولۋى ەسكەرىلمەدى.

رەيتينگكە سايكەس، اسكەري قۋاتى ەڭ جوعارى ەلدەر — ا ق ش، رەسەي جانە قىتاي. ال بۋتان رەيتينگتىڭ ەڭ سوڭىندا تۇر.

ت م د ەلدەرىنىڭ ىشىندە رەسەيدەن باسقا قازاقستاننىڭ كورسەتكىشى ۋكراينا، ءازىربايجان، بەلارۋس جانە وزبەكستاننان تومەن. رەيتينگتە قازاقستاننان تومەن تۇرىكمەنستان، ارمەنيا، قىرعىزستان، تاجىكستان جانە مولدوۆا ورنالاسقان.

قازاقستاننان جوعارى تۇرعان ت م د ەلدەرىنىڭ ىشىندە رەسەي قورعانىس سالاسىنا 82,6 ميلليارد ا ق ش دوللارىن، ۋكراينا 30 ميلليارد ا ق ش دوللارىن، ءازىربايجان 3,1 ميلليارد ا ق ش دوللارىن جۇمسايدى. بۇل رەتتە بەلارۋس پەن وزبەكستاننىڭ بيۋدجەتى قازاقستانداعىدان بىرنەشە ەسە تومەن بولىپ شىقتى: قازاقستاندا 2,6 ميلليارد ا ق ش دوللارى بولسا، اتالعان ەكى ەلدە تيىسىنشە 723,1 ميلليون جانە 692,5 ميلليون ا ق ش دوللارى.

Global Firepower ساراپشىلارىنىڭ مالىمەتىنشە، ق ر اۆياتسياسىندا 237 ۇشاتىن قۇرال، ونىڭ ىشىندە 75 جاۋىنگەرلىك تىكۇشاق بار. ال ۇشاقتاردىڭ ىشىندە 39 شابۋىلداۋشى ۇشاق، 81 جويعىش، 17 كولىك جانە 25 وقۋ- جاتتىعۋ ۇشاعى تىركەلگەن. ەلدىڭ قۇرلىقتاعى كۇشتەرىندە 300 تانك، 5,2 مىڭ بروندى تاسىمالداۋشى، 246 وزدىگىنەن جۇرەتىن ارتيللەريالىق قوندىرعى، 456 سۇيرەتىلەتىن ارتيللەريالىق قوندىرعى جانە 407 كوپ رەتتىك زىمىران جۇيەسى بار.

اسكەري قىزمەتكەرلەردىڭ جالپى سانى 77 مىڭ ادامدى قۇرايدى، ونىڭ 45 مىڭى بەلسەندى اسكەريلەر، 32 مىڭى اسكەريلەندىرىلگەن قۇرامالارعا جاتادى.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى