اقتوبەدە 140 وتباسى جەتىم بالالاردى اسىراپ الماق

نيەت بىلدىرگەندەر قاتارى جىل ساناپ كوبەيىپ كەلەدى.

قازىر ونداعان بالا پاتروناتتىق تاربيەگە بەرىلسە، 100 گە جۋىق ءبۇلدىرشىن جاڭا وتباسىن تاپتى. قامقورشىلار كۇنى قارساڭىندا وسى قايىرىمدى جاندارعا قۇرمەت كورسەتىلدى.

بۇل مەرەكەنى اتاپ وتۋگە بالالار كوپتەپ جينالىپتى. ولاردىڭ دەنى - كەزىندە جەتىمدەر ۇيىندە تۇرعان نەمەسە قامقورشىسىنان ايىرىلعاندار. قازىر اسىراپ العان انالارىنىڭ قاسىندا قۋانىشتارىن جاسىرمايدى. ءبىر ەمەس، بىرنەشە بالانى باۋىرىنا باسقاندار دا بار.

وسىنداي 16 وتباسىنا العىس ايتىلىپ، باعالى سىيلىقتار تاپسىرىلدى.

ميرا نۇرعاليەۆا، قالالىق ءبىلىم بەرۋ ءبولىمىنىڭ باس مامانى:

- بۇل سالتاناتتى كەشتىڭ نەگىزگى ماقساتى - جەتىم جانە اتا-انا قامقورلىعىنسىز قالعان بالالاردى ورنالاستىرۋ ءتۇرىن ناسيحاتتاۋ. ءبىر وتباسى ەڭ كوبى 4-5 بالادان اسىراپ الادى. ايگۇلدى وسىدان 4  جىل بۇرىن جەتەسوۆتەر وتباسى قامقورلىعىنا الىپتى. بوي جەتىپ كەلە جاتقان قىز كوپبالالى ورتاعا ءتۇستى. اناسى امانگۇل جۇبايىمەن بىرگە 3 بالا اسىراپ العان جانە وزدەرىنىڭ دە 3 بالاسى بار. ايگۇل وتباسى تاربيەسىن العانىنا قۋانادى. «ۇيدە ەرەكشە جىلۋلىق سەزىلەدى»، - دەيدى ول. بالالار ۇيىنەن بىرگە كەلگەن بەيبارىس پەن جۇلدىزايعا دا باۋىر باسقان.

ايگۇل ءىلياسوۆا، جەتەسوۆتەر وتباسىنىڭ مۇشەسى:

- ارينە، وتباسىداعى جاعداي باسقاشا. اتا-اناڭ، مەكتەپتە دوستارىڭ بولادى، باۋىرلارىڭ مەن اتا-اجەڭ دە بار.

ايگۇلدىڭ اناسى امانگۇلگە بۇگىن العىس حات تابىستالدى. جەتىمدەردى اسىراپ الىپ، انالىق قامقورلىق تانىتقانى ءۇشىن قۇرمەت كورسەتىلدى. قيىندىققا مويىمايتىن ايەل ءۇي شارۋاسىن دا، قوعامدىق جۇمىستى دا قاتار الىپ ءجۇر. جەتەسوۆتەر حالىق ءانسامبلى وبلىسقا تانىمال. بالالارى شەتىنەن ونەرلى. بارلىعى دا مۋزىكا مەكتەبىنە بارادى. بايقاۋلاردا جۇلدەلى ورىندار الىپ ءجۇر. امانگۇل ەشپانوۆا، ايگۇلدىڭ اناسى:

- تاربيە بەرۋگە ءبىلىمىم دە، اقىلىم دا جەتەدى، جولداسىم كومەكتەسەدى. زامانىندا ءبىزدىڭ اتا- انالارىمىز 10 بالادان تۋعان عوي، ءبىرىن-ءبىرى باعىپ وسىرەدى.

قالانىڭ وزىندە جەتىم جانە اتا-انا قامقورلىعىنسىز قالعان 454 بالا ەسەپتە تۇر. ونىڭ 200 دەن استامى -  تۇل جەتىمدەر. شەنەۋنىكتەر وسى بالالاردى پاتروناتتىق تاربيەگە الىپ، قامقور بولاتىن وتباسىلاردى ىزدەۋدەن جالىقپايمىز دەگەندى العا تارتادى.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى