كوروناۆيرۋس: قازاقستاندا ستاتسيونارلىق كارانتيندە جاتقانداردىڭ سانى 1400 دەن استى
«جالپى ەل بويىنشا قازىرگى تاڭدا 1400 دەن استام ازامات ستاتسيونارلىق كارانتيندە، ال 545 ازامات ءۇي كارانتينىندە جاتىر. تاعى باسقا مەملەكەتتەن كەلىپ جاتقان ازاماتتار ءۇش سانات بويىنشا باقىلاۋدا نەمەسە جالپى ەسەپتە تۇرادى. وسى جاعدايعا بايلانىستى قاجەتتى ءىس- شارالار مەملەكەتتىك دەڭگەيدە ۆەدومستۆوارالىق كوميسسيانىڭ شەشىمىمەن قابىلدانۋدا. وزدەرىڭىزگە ءمالىم، جالپى ۇلكەن شارالارعا تىيىم سالىنىپ، ولار توقتاتىلدى. قازىر قاجەتتى سانيتارلىق- ەپيدەميولوگيالىق شارالار ەنگىزىلۋدە. ارينە، ءبىزدىڭ نەگىزگى ماقساتىمىز - وسى كوروناۆيرۋس ينفەكسياسىنىڭ تاراتىلۋىن توقتاتۋ. بۇل باعىتتا سانيتارلىق- ەپيدەميولوگيالىق قىزمەت قاجەتتى بارلىق شارانى قابىلداۋدا»، - دەدى ەلجان ءبىرتانوۆ «حابار 24» ارناسىنان تىكەلەي ەفيردە.
ونىڭ ايتۋىنشا حالىق كوپ جينالاتىن ورىنداردا ارنايى شارالار كۇشەيتىلگەن. الماتى جانە نۇر-سۇلتان قالالارىندا تىركەلگەن ازاماتتارعا بايلانىستى بارلىق باقىلاۋ شاراسى ەنگىزىلدى.
ايتا كەتسەك بىرەر مينۋت بۇرىن عانا ەلجان ءبىرتانوۆ قازاقستاندا كوروناۆيرۋس جۇقتىرعانداردىڭ سانى 8 گە جەتكەنىن، جاڭادان جۇقتىرعانداردىڭ ءبىرى سەۋلدەن ۇشىپ كەلگەنىن حابارلاعان ەدى.
