ءۇش جىلدا جازدىق جايىلىمداردا 1400 گە جۋىق سۋ قۇدىعى قازىلدى

بۇل تۋرالى بۇگىن «جايىلىمدار تۋرالى» قازاقستان رەسپۋبليكاسى زاڭىنىڭ جوباسى تالقىلانعان ءماجىلىستىڭ جالپى وتىرىسىندا ق ر اۋىل شارۋاشىلىعى ۆيتسە- ءمينيسترى گۇلميرا يسايەۆا ءمالىم ەتتى، دەپ حابارلايدى قازاقپارات.

«2014-2016 -جىلدار ارالىعىندا بىزدە 1142 قۇدىق قازۋ جوسپارلانعان بولاتىن. بۇگىندە جوسپار ارتىعىمەن ورىندالىپ، قازىردىڭ وزىندە 4 ميلليارد تەڭگەدەن استام سوماعا 1377 قۇدىق قازىلدى. بۇعان قوسا، قۇدىقتاردى قازۋعا مەملەكەت ەسەبىنەن شىعىنداردى وتەۋگە 80 پايىزدىق سۋبسيديا بار، ال قالعان 20 پايىزىن فەرمەر ليزينگ باعدارلاماسى بويىنشا پايدالانا الادى»، - دەدى ۆيتسە- مينيستر.

ونىڭ ايتۋىنشا، فەرمەرلەردىڭ جازدىق جايىلىمداردا قۇدىق قازۋ ءۇشىن شىعىنداعان قارجىسىن قايتارۋعا 2 ميلليارد تەڭگەدەن استام سوما جۇمسالعان.

سونىمەن بىرگە گ. يسايەۆا جايىلىمدار قۇرۋعا ارنالعان ينۆەستيتسيالىق سۋبسيديا قۇرالدارىن كەڭەيتۋدى كوزدەيتىن باعدارلاما ازىرلەنىپ جاتقانىن ايتتى. اتالعان باعدارلاما سۋات قۇرىلعىلارى ءۇشىن بالاما ەنەرگيا كوزدەرىن قۇرۋ شىعىندارىن قايتارۋدى قاراستىرادى. 2020 -جىلعا دەيىن ەلىمىزدىڭ بارلىق وڭىرلەرىندە 4 مىڭنان استام قۇدىق قازۋ جوسپارلانعان. ال ينۆەستيتسيالىق شىعىنداردى وتەۋگە 28 ميلليارد تەڭگە كوزدەلىپ وتىر. مۇنان بولەك، شوپاندارعا ارنالعان ۆاگون، باسپاناعا كەتكەن شىعىننىڭ 40 پايىزىن سۋبسيديالاۋ قاراستىرىلعان.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى