بۇگىننەن باستاپ جەكەلەگەن ازاماتتار ءۇشىن جاردەماقى مولشەرى 14,5 پايىزعا ءوستى
سونىمەن قاتار 7 جانە ودان دا كوپ بالا تۋىپ، تاربيەلەگەن ماراپاتتالعان انالارعا بەرىلەتىن جاردەماقى مولشەرى 7,4 ايلىق ەسەپتىك كورسەتكىشكە دەيىن ارتتىرىلدى.
2023 -جىلعى 29 ناۋرىزدا VIII سايلانعان پارلامەنتتىڭ ءبىرىنشى سەسسياسىنىڭ اشىلۋىندا مەملەكەت باسشىسى مۇگەدەكتىگى بار ادامداردى قولداۋ شارالارىن كۇشەيتۋ قاجەتتىگىن اتاپ وتكەن بولاتىن.
ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا، الەۋمەتتىك كودەكس شەڭبەرىندە 2023 -جىلعى 1 شىلدەدەن باستاپ مەملەكەتتىك جاردەماقىلاردىڭ مىناداي تۇرلەرىنىڭ مولشەرىن ورتا ەسەپپەن 14,5 پايىزعا ارتتىرۋ كوزدەلگەن:
- مۇگەدەكتىك بويىنشا؛
- اسىراۋشىسىنان ايىرىلۋ جاعدايى بويىنشا؛
- ارنايى الەۋمەتتىك جاردەماقىلار؛
- مۇگەدەكتىگى بويىنشا ايلىق جاردەماقى مولشەرىنە دەيىن جاسىنا بايلانىستى زەينەتاقى تولەمدەرىنە قوسىمشا اقى الۋشىلاردى قوسپاعاندا، جاسىنا بايلانىستى زەينەتاقى تولەمدەرى نەمەسە ەڭبەك سىڭىرگەن جىلدارى ءۇشىن زەينەتاقى تولەمدەرى تاعايىندالعان ءبىرىنشى، ەكىنشى جانە ءۇشىنشى توپتاعى مۇگەدەكتىگى بار ادامدارعا ارناۋلى مەملەكەتتىك جاردەماقىلار؛
- بايقوڭىر قالاسىندا تۇراتىن جانە رەسەي فەدەراتسياسىنىڭ زاڭناماسىنا سايكەس مۇگەدەكتىگى بويىنشا زەينەتاقى الاتىن 7 جاسقا دەيىنگى مۇگەدەكتىگى بار بالالارعا ارناۋلى مەملەكەتتىك جاردەماقى؛
- ساياسي قۋعىن-سۇرگىن قۇرباندارىنا نەمەسە ساياسي قۋعىن-سۇرگىننەن زارداپ شەككەن، مۇگەدەكتىگى بار نەمەسە زەينەتكەر بولىپ تابىلاتىن ادامدارعا ارناۋلى مەملەكەتتىك جاردەماقى؛
- قازاقستان رەسپۋبليكاسى الدىندا ەرەكشە ەڭبەگى ءۇشىن زەينەتاقى تاعايىندالعان ادامدارعا ارناۋلى مەملەكەتتىك جاردەماقى.
وسىلايشا، جوعارىدا اتالعان جاردەماقى تۇرلەرىن 2022 -جىلمەن سالىستىرعاندا 23 پايىزعا ۇلعايتۋ قامتاماسىز ەتىلەدى (وسى جىلعى 1-قاڭتاردان باستاپ 8,5 پايىزعا ءوسۋدى ەسكەرە وتىرىپ). وسى ماقساتتارعا رەسپۋبليكالىق بيۋدجەتتەن قوسىمشا 37 ملرد تەڭگە ءبولىندى.
بۇدان باسقا، 2023 -جىلعى 1-شىلدەدەن باستاپ مەملەكەتتىك جاردەماقىلاردى 14,5 پايىزعا ارتتىرۋ كوزدەلگەن:
- ءبىرىنشى توپتاعى مۇگەدەكتىگى بار ادامعا كۇتىم جاسايتىن ادامعا؛
- مۇگەدەكتىگى بار بالانى (مۇگەدەكتىگى بار بالالاردى) تاربيەلەپ وتىرعان اناسىنا نەمەسە اكەسىنە، اسىراپ الۋشىعا، قورعانشىعا (قامقورشىعا) .
بۇگىندە بۇل جاردەماقىلاردىڭ مولشەرى 1,4 ەڭ تومەنگى كۇنكورىس دەڭگەيىن نەمەسە 2023 -جىلى 56794 تەڭگەنى قۇرايدى. الەۋمەتتىك كودەكس كۇشىنە ەنگەن كەزدە جاردەماقى مولشەرى 2023 -جىلى 1,61 ەڭ تومەنگى كۇنكورىس دەڭگەيىنە نەمەسە 65313 تەڭگەگە دەيىن ارتادى. وسى ماقساتتارعا رەسپۋبليكالىق بيۋدجەتتەن قوسىمشا 6,4 ميلليارد تەڭگە ءبولىندى.
الەۋمەتتىك كودەكستە سونداي- اق «التىن القا» القاسىمەن ناگرادتالعان نەمەسە بۇرىن «باتىر انا» اتاعىن العان، I جانە II دارەجەلى «انا داڭقى» وردەندەرىمەن ناگرادتالعان ايەلدەرگە تولەنەتىن جاردەماقى مولشەرىن سارالاۋ كوزدەلەدى.
ەگەر بۇگىندە 6، 7 جانە ودان دا كوپ بالا تۋىپ، تاربيەلەگەن انالار بىردەي مولشەردە جاردەماقى السا، ەندى 2023 -جىلدىڭ 1-شىلدەسىنەن باستاپ «التىن القا»، «باتىر انا»، I جانە II دارەجەلى «انا داڭقى» وردەندەرىمەن ناگرادتتالعان، ياعني 7 جانە ودان دا كوپ بالانى ومىرگە اكەلىپ تاربيەلەگەن انالارعا ارنالعان جاردەماقى مولشەرى 7,4 ايلىق ەسەپتىك كورسەتكىشكە دەيىن ارتتىرىلادى.
سونىمەن قاتار، وسى جىلدىڭ 1-شىلدەسىنەن باستاپ مەملەكەتتىك الەۋمەتتىك ساقتاندىرۋ قورىنان تولەنەتىن ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ جاعدايلارى بويىنشا الەۋمەتتىك تولەمدەردىڭ مولشەرىن 14,5 پايىزعا ارتتىرۋ جۇرگىزىلەتىن بولادى.
تولەمدەردىڭ مولشەرى جەكە جانە مىنالارعا بايلانىستى: سوڭعى 2 -جىلداعى م ءا س ق-عا الەۋمەتتىك اۋدارىمدار جۇرگىزىلگەن ورتاشا ايلىق تابىس، ەڭبەككە قابىلەتتىلىگىنەن ايىرىلۋ كوەففيسيەنتتەرى، اسىراۋىنداعى ادامدار سانى، مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى جانە تابىستى اۋىستىرۋ.
بۇل تولەمدەر رەسپۋبليكالىق بيۋدجەتتەن تولەنەتىن ۇقساس جاردەماقىلارعا قوسىمشا جۇزەگە اسىرىلادى، سونداي-اق 2023 -جىلعى 1-قاڭتاردان باستاپ ق ر ۇكىمەتىنىڭ شەشىمىمەن ولاردىڭ مولشەرى 8,5 پايىزعا ۇلعايتىلدى.
جوعارىدا كورسەتىلگەن جاردەماقىلاردىڭ مولشەرىن ارتتىرۋ ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەلەرىندە بار مالىمەتتەر نەگىزىندە اۆتوماتتى تۇردە جۇرگىزىلەتىن بولادى، وسىعان بايلانىستى الۋشىلاردىڭ ۋاكىلەتتى ورگاندارعا قوسىمشا ءوتىنىشى تالاپ ەتىلمەيدى.
