قازاقستاندا 14 پەن 24 جاس ارالىعىنداعى 630 مىڭنان استام جاستىڭ ماماندىعى جوق - ق ر ءبىلىم جانە عىلىم ءمينيسترى
بۇل تۋرالى بۇگىن ق ر پارلامەنتى ماجىلىسىندەگى «تەحنيكالىق جانە كاسىپتىك، جوعارى ءبىلىم بەرۋ جۇيەسىندە ەكونوميكا سالالارى ءۇشىن كادرلار دايارلاۋدىڭ ساپاسى مەن پەرسپەكتيۆالارى تۋرالى» پارلامەنتتىك تىڭداۋ بارىسىندا ق ر ءبىلىم جانە عىلىم ءمينيسترى اسلان ءسارىنجىپوۆ ءمالىم ەتتى.
«ءالى كۇنگە دەيىن حالىقتىڭ ءبىرىنشى تەحنيكالىق كاسىپ يگەرۋىنە تەڭ قولجەمدىلىك قامتاماسىز ەتىلمەگەن. بۇگىندە تەحنيكالىق جانە كاسىپتىك ءبىلىم بەرۋ جۇيەسىندە اتالعان ساناتتاعى جاستاردىڭ تەك 17 پايىزى قامتىلعان» ، - دەدى ول.
ءمينيستردىڭ اتاپ وتۋىنشە، قازىرگى ۋاقىتتىڭ وزىندە 14 پەن 24 جاس ارالىعىنداعى 633,2 مىڭ جاستىڭ ماماندىعى جوق. بۇلار جالپى قازاقستان جاستارىنىڭ 20 پايىزىن قۇرايدى. ولاردىڭ 94 مىڭى ەش جەردە جۇمىس ىستەمەيدى.
«بالالار مەن جاسوسپىرىمدەر سانىنىڭ ءوسىمى دە ءبىلىم بەرۋ جۇيەسىندەگى جۇكتەمەنى ارتتىرىپ وتىر. پروبلەما وڭىرلىك تەڭگەرىمسىزدىك قامتۋىمەن دە ۇلعايىپ كەلەدى. وڭتۇستىكتە 7 مىڭ ورىن تاپشىلىعى بار. بۇل رەتتە سولتۇستىك جانە شىعىس وڭىرلەردەگى كوللەدجدەردەگى پروفيتسيت 4 مىڭ ورىندى قۇرايدى» ، - دەدى ا. ءسارىنجىپوۆ.
ونىڭ ايتۋىنشا، جىل سايىن ەلىمىزدە 22 مىڭنان استام مەكتەپ تۇلەگى ەڭبەك نارىعىنا شىقسا، سونىڭ تەڭ جارتىسى - وڭتۇستىك وڭىرلەردىڭ ازاماتتارى.
ۇكىمەتتىڭ قولعا العان جۇمىستارى ناتيجەسىندە جوعارى وقۋ ورىندارى بىتىرۋشىلەرىنىڭ جۇمىسقا ورنالاسۋ كورسەتكىشى 10 پايىزعا ارتتى.
«بۇگىندە 130 ج و و مەن 849 كوللەدجدە ميلليوننان استام ادام ءبىلىم الۋدا. جىل سايىن 300 مىڭ تۇلەك ەڭبەك نارىعىنا شىعادى. ولاردىڭ كوپشىلىگى، ياعني 80 پايىزى جوعارى وقۋ ورنىنان كەيىن، 70 پايىزى كوللەدجدەن كەيىن كاسىپتەرى بويىنشا العاشقى جىلى جۇمىسقا ورنالاسادى» ، - دەدى ول.
ءمينيستردىڭ اتاپ وتۋىنشە، سوڭعى 3 جىلدا تەحنيكالىق جانە كاسىپتىك ءبىلىم بەرۋگە ارنالعان بيۋدجەت قاراجاتى 2 ەسەگە دەيىن ۇلعايدى. كوللەدجدەردەگى شەبەرحانالاردى جابدىقتاۋعا ارنالعان قاراجات 6 ەسەگە ءوستى. دۋالدى وقىتۋ جۇيەسى ەنگىزىلۋدە.
«زاماناۋي وقۋ ورىندارى مەن باسقارۋدىڭ جاڭا مودەلدەرى قۇرىلۋدا. ناتيجەسىندە بىتىرۋشىلەردى ماماندىقتارى بويىنشا جۇمىسقا ورنالاستىرۋ كورسەتكىشى 10 پايىزعا ارتتى» ، - دەد ا. سارىنجىپوۆ.
ونىڭ سوزىنە قاراعاندا، سوڭعى 2 جىلدىڭ ىشىندە جوعارى ءبىلىم بەرۋ سالاسىن قارجىلاندىرۋ 20 پايىزعا ارتىپ وتىر. جوعارى وقۋ ورىندارى جەلىسىن وڭتايلاندىرۋ ناتيجەسىندە ولاردىڭ سانى 16عا ازايدى. 2013 - جىلى 9 ج و و حالىقارالىق رەيتينگكە ەندى. ال ولاردى عىلىمىن قارجىلاندىرۋ كولەمى 7 ەسەگە ارتتى.
«وسىلايشا كاسىپتىك ءبىلىم بەرۋ جۇيەسى ەكونوميكا ءۇشىن كادرلار دايارلاۋداعى ءوز مىندەتىن ورىنداۋدا» ، - دەدى ول.
