ەگيپەتتە وتكەن تۋرنيردە قازاقستاندىق بالۋاندار 13 مەدال جەڭىپ الدى

بۇل تۋرالى قازاقستان كۇرەس تۇرلەرى فەدەراتسياسىنىڭ باسپا ءسوز قىزمەتىندە ءمالىم ەتتى، دەپ حابارلايدى قازاقپارات ءتىلشىسى.

قازاقستان كۇرەس تۇرلەرى فەدەراتسياسىنىڭ مالىمەتىنشە، يبراھيم مۇستافا جۇلدەسىنە ارنالعان حالىقارالىق تۋرنيردىڭ سوڭعى كۇنى ەركىن كۇرەستەن 57 كەلىدە راحات قالجان قولا مەدالعا يە بولدى.

وسىلايشا قازاقستان قۇراماسى بۇل جولعى دودانى 2 التىن، 3 كۇمىس، 8 قولا جۇلدەمەن قورىتىندىلادى.

ەسكە سالايىق، بۇعان دەيىن ەگيپەتتەگى تۋرنيردىڭ العاشقى كۇنى قازاقستاندىق بالۋاندار 7 مەدال، ەكىنشى كۇنى 3 مەدال، ءۇشىنشى كۇنى 2 مەدال جەڭىپ العان ەدى. سونداي-اق، بيىل ءساۋىر ايىندا استانادا ەرەسەكتەر اراسىندا كۇرەس تۇرلەرىنەن ازيا چەمپيوناتى وتەتىنىن حابارلاعانبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى