اتىراۋ وبلىسىندا 13 جىلدان بەرى قۇجاتسىز جۇرگەن ايەل انىقتالدى
وبلىستىق پوليتسيا دەپارتامەنتى باسپا ءسوز قىزمەتىنىڭ اقپاراتىنا قاراعاندا، «ميگرانت» ءىس- شاراسى كەزىندە 13 جىلدان بەرى ەلدەن كەتپەي جۇرگەن شەتەلدىك انىقتالعان.
«قىزىلقوعا اۋداندىق پوليتسيا ءبولىمىنىڭ ۋچاسكەلىك پوليتسيا ينسپەكتورى قايىربەك قامالادەنوۆ اكىمشىلىك اۋماقتاعى تۇرعىن ۇيلەردى تەكسەرۋ كەزىندە وزبەكستاندىق ايەلدى انىقتاپ، كوشى-قون قىزمەتى توبىنا جەتكىزدى. اتالعان توپ قىزمەتكەرلەرى شەتەلدىك ايەلدىڭ قازاقستان رەسپۋبليكاسىنىڭ اۋماعىنا 2010-جىلدارى كىرگەنىن انىقتادى. سودان بەرى قۇجاتىنىڭ ەلدە بولۋ مەرزىمى بىتكەنىن بىلە تۇرا، قازاقستان اۋماعىنان شىعىپ كەتپەگەن. وزبەكستاندىق ايەل قازاقستان ازاماتىنا كۇيەۋگە شىعىپ، زاڭدى نەكەگە وتىرعان. ەكى بالانى دۇنيەگە اكەلگەن. شەتەلدىكتىڭ تۇسىندىرۋىنشە، قازاقستان رەسپۋبليكاسىنىڭ ازاماتتىعىن الۋعا نيەتى بار. ءبىراق، 13 جىلدان بەرى ازاماتتىق الۋعا قاجەتتى قۇجاتتاردى تولىق جيناقتاپ تاپسىرماعان»، - دەپ حابارلادى دەپارتامەنتتىڭ باسپا ءسوز قىزمەتى.
قازىر اتالعان دەرەككە قاتىستى قىزىلقوعا اۋداندىق پوليتسيا بولىمىنە قاراستى كوشى-قون قىزمەتى توبىنىڭ قىزمەتكەرلەرى حاتتاما تولتىردى. جيناقتالعان ءىس-قۇجاتتارى قىزىلقوعا اۋداندىق سوتىنا جىبەرىلدى.
ەسكە سالا كەتەلىك، بۇعان دەيىن وزبەكستاندىق قاريا اتىراۋدا 21 جىل بويى قۇجاتسىز جۇرگەنىن حابارلاعان بولاتىنبىز. وزبەكستان رەسپۋبليكاسىنان 2000-جىلدارى كەلگەن 72 جاستاعى قاريا جەرگىلىكتى ايەلمەن وتباسىن قۇرعان. ەرلى-زايىپتىنىڭ 5 بالاسى بار. شەتەلدىكتىڭ جەكە باسىن انىقتاپ، ەلىنە قايتارۋ ءۇشىن ءتيىستى قۇجاتتار تىزبەسى وزبەكستان رەسپۋبليكاسىنىڭ اقتاۋ قالاسىنداعى باس كونسۋلدىعىنا جولدانعان.
