نەسيەسى بار ساربازدار ونى 13 ايدان كەيىن اسكەردەن كەلگەندە تولەي الادى
قورعانىس مينسترلىگى باس شتابىنىڭ ۇيىمداستىرۋ- جۇمىلدىرۋ جۇمىستارى دەپارتامەنتىنىڭ اعا وفيتسەرى رۋسلان تاپاشيەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
«قازىر مەرزىمدى اسكەري قىزمەتكە شاقىرىلاتىن جانە مەرزىمدى اسكەري مىندەتىن اتقارىپ جۇرگەن ازاماتتاردىڭ نەسيەسىن كەيىنگە قالدىرۋ ماسەلەسى كوپ ءسوز بولىپ جاتىر. وسىعان سايكەس، ءبىزدىڭ قورعانىس مينيسترلىگى مەن قارجى نارعىن رەتتەۋ جانە دامىتۋ اگەنتتىگى اراسىندا 2022 -جىلدىڭ 5- جەلتوقسانىندا مەموراندۋمعا قول قويىلدى. سوعان ساي ءىس- قيمىل الگوريتىمى بەكىتىلدى جانە قازىر بۇل باعىتتا تولىققاندى جۇمىس جۇرگىزىلىپ جاتىر. ەندى اسكەري قىزمەتكە شاقىرىلعان نەمەسە ونى وتكەرۋشى ازاماتتارعا اسكەري ءبولىم ۇسىنعان انىقتاما ارقىلى ەكىنشى دەڭگەيلى بانكتەر الدىنداعى ولاردىڭ نەسيەسى كەيىنگە قالدىرىلادى. بۇل ۋاقىت 13 اي دەپ كورسەتىلگەن. ويتكەنى، اسكەري مىندەتتى وتەۋ مەرزىمى 12 اي. ال قوسىمشا 1 اي اسكەردەن كەلگەننەن كەيىن جۇمىسقا ورنالاسۋى ءۇشىن بەرىلەدى»، - دەپ ءتۇسىندىردى باس شتابتىڭ وكىلى.
رۋسلان تاپاشيەۆتىڭ ايتۋىنشا، ازامات اسكەري بولىمگە بارعاننان كەيىن ءبولىم كومانديرىنە ءوتىنىش بەرىپ، انىقتاما الادى.
كەيىن ول قۇجات سەنىمحات بويىنشا اسكەري قىزمەتتى وتكەرۋشى ادامنىڭ تۋىستارىنا بەرىلەدى.
تيىسىنشە، ولار انىقتامانى قارىز العان ەكىنشى دەڭگەيلى بانكتەرگە ۇسىنادى جانە سول ساتتەن باستاپ نەسيەنى تولەۋ كەيىنگە قالدىرىلادى.
اۆتور
ءاليحان اسقار
