قازاقپارات كۇنتىزبەسى: 13- قاڭتار

ەستە قالار وقيعالار

1926-جىلى قازىرگى قازاق مەملەكەتتىك اكادەميالىق دراما تەاترى قۇرىلدى. وسى كۇنى قوشكە (قوشمۇحامبەت) كەمەڭگەروۆتىڭ «التىن ساقينا» پەساسىمەن قازاقتىڭ ءبىرىنشى كاسىبي ۇلتتىق تەاترى - قازاق دراما تەاترىنىڭ (قازىرگى م. اۋەزوۆ اتىنداعى قازاق مەملەكەتتىك اكادەميالىق دراما تەاترى) رەسمي اشىلۋ ءراسىمى ءوتتى.

ونەر ۇجىمى العاش رەت 1925-جىلى قىزىلوردا قالاسىندا ۇيىمداستىرىلعان بولاتىن.

1929 -جىلى تەاتر ترۋپپاسى الماتىعا قونىس اۋداردى.

1937 -جىلى اكادەميالىق مارتەبەسىن السا، ال 1961-جىلى قازاقتىڭ زاڭعار جازۋشىسى مۇحتار اۋەزوۆتىڭ ەسىمى بەرىلدى. تەاتر ساحناسىندا حالىق شىعارماشىلىعىنىڭ تانىمال شەبەرلەرى: يسا بايزاقوۆ، امىرە قاشاۋبايەۆ، سەركە قوجامقۇلوۆ، قاليبەك قۋانىشبايەۆ، ت. ب. ونەر كورسەتكەن.

1926-1932 -جىلدارى تەاترعا اكتەر جانە رەجيسسەر جۇمات شانين باسشىلىق جاساعان.

1934 -جىلى الماتىدا قازاق مۋزىكالىق دراما تەاترى (قازىرگى اباي اتىنداعى قازاق مەملەكەتتىك اكادەميالىق وپەرا جانە بالەت تەاترى) قۇرىلدى. تەاتر ساحناسىندا ەڭ ءبىرىنشى مۇحتار اۋەزوۆتىڭ «ايمان- شولپان» سپەكتاكلى مەن بەيىمبەت ءمايليننىڭ «شۇعا» دراماسى قويىلدى.

2004 -جىلى قازاقستان رەسپۋبليكاسىنىڭ رۋحاني جانە ءبىلىم بەرۋ سالالارىن دامىتۋ، مادەني مۇرالاردى پايدالانۋدىڭ تيىمدىلىگىن ارتتىرۋ ماقساتىندا «مادەني مۇرا» مەملەكەتتىك باعدارلاماسى قابىلداندى.

2006 -جىلى قازاقستان رەسپۋبليكاسى ۇكىمەتىنىڭ قاۋلىسىمەن 1994-جىلى قازاقستان راتيفيكاتسيالاعان ب ۇ ۇ بالالار قۇقىعى تۋرالى كونۆەنتسياعا سايكەس ق ر ءبىلىم جانە عىلىم مينيسترلىگىنىڭ بالالار قۇقىعىن قورعاۋ جونىندەگى كوميتەتى قۇرىلدى. كوميتەتتىڭ باستى مىندەتى - بالالاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋ بويىنشا مەملەكەتتىك ساياساتتى جۇزەگە اسىرۋ.

2010 -جىلى استانادا قازاقستاندىق ۇلەستى دامىتۋ ماسەلەلەرى بويىنشا ساراپتاما كەڭەسىنىڭ 1- وتىرىسى ءوتتى.

2011 -جىلى ماسكەۋ قالاسىنىڭ اتاۋلى وقيعالار مەن وتاندىق تاريح جانە مادەنيەت قايراتكەرلەرىنىڭ ەسىمىن ماڭگىلىك ەستە قالدىرۋ جونىندەگى كوميسسياسى قازاقستاننىڭ رەسەيدەگى ەلشىلىگىنىڭ قازاقتىڭ مەملەكەتتىك جانە ساياسي قايراتكەرى تۇرار رىسقۇلوۆتىڭ ەسىمىن ماڭگىلىك ەستە قالدىرۋ تۋرالى ۇسىنىسىن قولدادى. كوميسسيانىڭ شەشىمىنە سايكەس، مەموريالدىق تاقتا ماسكەۋدە ت. رىسقۇلوۆ 1931-1934-جىلدارى ءومىر سۇرگەن پوكروۆسكي بۋلۆار، 14 مەكەنجايىنداعى ۇيگە ورناتىلاتىن بولادى.

ەستەلىك تاقتانى كوركەمدەۋدى جانە ونى قارجىلاندىرۋدى قازاقستاندىق تاراپ ءوز موينىنا الادى.

2012 -جىلى ورالدا اقىن قاسىم امانجولوۆ پەن ابدوللا جۇماعاليەۆتەر تۇرعان، جۇمىس ىستەگەن ۇيلەرگە ورناتىلعان ەسكەرتكىش تاقتالاردىڭ اشىلۋ ءراسىمى ءوتتى.

2017 -جىلى قازاقستاندىق بوكسشى، الەمنىڭ ەكى دۇركىن چەمپيونى، وليمپيادا چەمپيونى سەرىك ساپيەۆ 2017-جىلى الماتىدا وتكەن دۇنيەجۇزىلىك قىسقى ۋنيۆەرسيادا قوناقتارى مەن ەرىكتىلەرى ورنالاساتىن اتلەتيكا قالاشىعىنىڭ اكىمى بولىپ تاعايىندالدى.

2018 -جىلى قازاقستان رەسپۋبليكاسى زاڭناماسىن ەلەكتروندى نۇسقادا شوعىرلاندىرۋ ماقساتىندا ءبىرىڭعاي قۇقىقتىق اقپارات جۇيەسى جاسالدى. ول ءۇشىن نورماتيۆتىك قۇقىقتىق اكتىلەردىڭ ەتالوندىق باقىلاۋ بانكى مەن «ادىلەت» جۇيەسى بىرىكتىرىلدى.

2019 -جىلى قىزىلوردا قالاسى نازاربايەۆ زياتكەرلىك مەكتەبىنىڭ 12- سىنىپ وقۋشىسى ءاليحان شاكىمان 3D مودەلدەۋ ارقىلى جەل گەنەراتورىنىڭ بىرەگەي ءتۇرىن جاساپ شىعاردى. عىلىمي جۇمىس بويىنشا وقۋشى ەكى جىل جۇمىس ىستەگەن.

ينجەنەرلەردىڭ كومەگىمەن يدەيانىڭ ءتۇپنۇسقاسى شىقتى. اتالمىش جەل گەنەراتورى ەكولوگيالىق زيانسىز، ءبىر جاعىنان شۋدى ازايتسا، ەكىنشى جاعىنان ۇنەمدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى