ەلوردالىق 13 مىڭ ستۋدەنت پاتەر جالداۋعا ءماجبۇر

«قازىرگى تاڭدا باسقارمامەن جاستارعا الەۋمەتتىك ليفتى قۇرۋعا، جاستاردىڭ بويىنداعى وتانشىلدىق سەزىمىن قالىپتاستىرۋعا، وسكەلەڭ ۇرپاقتىڭ شىعارماشىلىق قابىلەتىن انىقتاۋعا، جاستاردىڭ بويىندا جەمقورلىقتىڭ كەز كەلگەن ارەكەتىنە مۇلدەم توزبەۋشىلىك قالىپتاستىرۋعا، سالاۋاتتى ءومىر سالتىن ناسيحاتتاۋعا، ەتنوسارالىق كەلىسىمدى نىعايتۋعا، ۇلتتىق جانە وتباسىلىق سالتتى ناسيحاتتاۋعا، ستۋدەنت جاستاردى قولداۋعا، جاستار باستامالارى مەن يننوۆاتسيالىق يدەيالارىن انىقتاۋعا، قۇقىقتىق مادەنيەت پەن ءدىني تانىمدى كوتەرۋگە باعىتتالعان ءبىرقاتار شارا جۇزەگە اسىرىلىپ جاتىر. اتالعان شارالار جاستاردىڭ وزەكتى پروبلەمالارىن ەسكەرە وتىرىپ، مەملەكەتتىك جاستار ساياساتىن جەتىلدىرۋگە باعىتتالعان»، - دەدى ول استانانىڭ توڭىرەگىندە تۇراتىن حالىقتىڭ بوس ۋاقىتىن ءتيىمدى ۇيىمداستىرۋ ماسەلەرىنە ارنالعان شارا بارىسىندا.

باسقارما باسشىسى رەسمي ستاتيستيكالىق مالىمەتتەرىنە سايكەس، 2016 -جىلدىڭ 1 - قاڭتارىندا قالا جاستارىنىڭ سانى 200 مىڭعا جەتكەندىگىن اتاپ ءوتتى.

«ياعني، جاستار ەلوردا حالقىنىڭ جالپى سانىنىڭ 24 پايىزىن قۇرايدى. الايدا بۇل رەسمي ستاتيستيكا كەز كەلگەن مەگاپوليسكە ءتان جاسىرىن كوشى- قون زاڭدىلىعىن ەسكەرمەيدى. شىن مانىندە استانادا 250-300 مىڭعا دەيىن جاستار بار»، - دەدى اسحات ورالوۆ.

 ونىڭ ايتۋىنشا، ەلوردا جاستارىنىڭ باسىم بولىگىن ستۋدەنتتەر قۇرايدى. قازىرگى ۋاقىتتا ەلوردادا 14 جوعارى وقۋ ورنى مەن 35 كوللەدج بار. ولاردا 80 مىڭنان استام ستۋدەنت وقيدى.

«وسى رەتتە ايتا كەتەرلىك ماسەلە بار. 2016 -جىلى 14 جوعارى وقۋ ورنىندا 30 جاتاقحانا بولعان. 2017 -جىلى 4 جاتاقحانا سالىندى. ءبىراق بۇگىنگى كۇنى 12 مىڭعا جۋىق ستۋدەنت جاتاقحانادا تۇرسا، 10 مىڭ ستۋدەنتكە جاتاقحانا جەتىسپەيدى. بۇعان قوسا، 35 كوللەدجدىڭ 2200 ستۋدەنتكە ارنالعان 16 جاتاقحاناسى بار. قاجەتتىلىك ءالى دە 3 مىڭ ورىن. جالپى ساناساق، ەلوردادا 13 مىڭ ستۋدەنتكە جاتاقحانا جەتىسپەيدى»، - دەدى باسقارما باسشىسى.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى