قىتايدا جەكە دەرەكتەردى ساۋدالادى دەگەن كۇدىكپەن 13 ادام ۇستالدى
بۇل ءىس حەنشۋي قالاسىندا تۇراتىن ۆان اتتى ەر ادامنىڭ 2016-جىلدىڭ سوڭىندا كوپتەگەن جاعىمسىز قوڭىراۋلاردى العاننان كەيىن قوزعالعان.
ول ءوزىنىڭ جەكە دەرەكتەرىنىڭ بوتەن بىرەۋلەردىڭ قولىندا بولعانىنان كۇدىكتەنگەن. بيىل ناۋرىز ايىندا ول ونلاين-الەۋمەتتىك جەلىدەن ازاماتتاردىڭ جەكە اقپاراتتارىن ساۋدالاۋ ءۇشىن اشىلعان ەكى توپتى تاۋىپ الادى.
ول دالەل رەتىندە 500 يۋانگە 40 مىڭ جەكە دەرەك ساتىپ الىپ، بۇل تۋرالى پوليتسياعا حابارلايدى. پوليتسيا شيتسزيانچجۋان جانە حەنشۋي قالالارىنان ەكى كۇدىكتىنى انىقتاپ، مامىر ايىنىڭ سوڭىندا ۇستايدى.
ارى قاراي تەرگەۋ بارىسىندا 11 ادامنان تۇراتىن توپ قۇرىقتالادى. قاسكۇنەمدەردىڭ قولىنا تۇسكەن ون پروۆينتسيادا تۇراتىن تۇرعىنداردىڭ 4 ميلليون جەكە دەرەگى الىنعان.
تەرگەۋ ناتيجەسىنە سايكەس، ەكى كۇدىكتى بۇرىن ءبىر كومپانيادا جۇمىس ىستەپ، بىرەۋى جۇمىستان بوساعاننان كەيىن جەكە اقپاراتتاردى ساۋدالاۋمەن اينالىسقان.
ولار دەرەكتەردى جوعارىدا اتالعان 11 كۇدىكتىگە ساتقان، ال ولار ودان ارى قاراي باسقا فيرمالارعا قايتا ساتىپ شىققان.
قىتايدىڭ قىلمىستىق كودەكسىنە سايكەس، جەكە اقپاراتتاردى ساتۋ جانە الۋ بويىنشا ايىپتالعان تۇلعالار «اسا اۋىر جاعدايدا» جەتى جىلعا دەيىن باس بوستاندىعىنان ايىرىلادى. جاڭا سوت تۇسىندىرمەسىنە ساي، «اسا اۋىر» جاعداي دەپ ءوزارا جازىسقان 5000 حات-حابار، تۇرعىلىقتى مەكەنجايى تۋرالى، دەنساۋلىعى مەن ازاماتتاردىڭ ترانزاكتسيالارى جايلى دەرەكتەردى بەرۋ نەمەسە ساتۋ زاڭسىز الۋ بولىپ سانالادى. قازىرگى تاڭدا تەرگەۋ جالعاسۋدا.
