قازاقستاننىڭ اۋە قورعانىسى كۇشتەرى 13 جىلدىعىن اتاپ ءوتتى - فوتو
«اسكەري ءبولىم جەكە قۇرامى كۇندىز-ءتۇنى كەز كەلگەن اۋا رايى جاعدايىندا قازاقستان رەسپۋبليكاسىنىڭ قورعانىس قابىلەتتىلىگىنە قوماقتى ۇلەس قوسا وتىرىپ، ەلوردامىزدىڭ اۋە كەڭىستىگىن، قازاقستاننىڭ اۋە شەپتەرىن كۇزەتۋ جونىندە جاۋىنگەرلىك كەزەكشىلىكتى اتقارادى»، دەلىنگەن حابارلامادا.
قازىرگى ۋاقىتتا ءبولىم قارسىلاستىڭ اۋەدەن شابىلداۋ قۇرالدارىن انىقتاۋ جانە جويۋ جونىندەگى جوعارى جاۋىنگەرلىك مۇمكىندىكتەرى بار زاماناۋي قارۋ-جاراقپەن قامتاماسىز ەتىلگەن.
«قۇرمەتتى ارىپتەستەر، جاۋىنگەرلىك دوستار سىزدەردى ءبولىمنىڭ قۇرىلۋ كۇنىمەن قۇتتىقتاعىم كەلىپ وتىر. بارشالارىڭىزعا ابىرويلارىڭىزدى ساقتاي وتىرىپ، وتانىمىزعا ادال قىزمەت ەتۋگە، قازاقستاندىق ارميانىڭ جاۋىنگەرى جوعارى اتاعىنا لايىقتى بولىپ، ماقتانىشپەن الىپ جۇرۋلەرىڭىزگە تىلەكتەسپىن»، - دەدى سالتاناتتى ءىس-شارا بارىسىندا ءبولىم كومانديرى پولكوۆنيك باعدات نۇرپەيىسوۆ.
ءبولىمنىڭ قۇرىلعان ساتىنەن باستاپ ءبولىم جەكە قۇرامى «قالقان» جانە «جاۋىنگەرلىك دوستاستىق» سياقتى تاكتيكالىق وقۋ-جاتتىعۋلارعا قاتىستى، قازاقستان رەسپۋبليكاسىنىڭ پرەزيدەنتىنەن گراموتا الدى، 2004-جىلى بولىمگە جاۋىنگەرلىك تۋ تابىس ەتىلدى.
سالتاناتتى ءىس-شارا بارىسىندا ءبولىم كومانديرى جاۋىنگەرلىك جانە مەملەكەتتىك-قۇقىقتىق دايارلىقتاعى ۇزدىكتەردى قۇرمەت گراموتالارى جانە باعالى سىيلىقتارمەن ماراپاتتادى.
