ماڭعىستاۋ وبلىسىندا جوعالىپ كەتكەن 13 جاسار قىز ءبىر تاۋلىكتەن سوڭ تابىلدى
جوعالعان قىزدىڭ تاتەسىنىڭ سوزىنە قاراعاندا، ول كوشەگە شىعىپ كەتكەننەن قايتىپ كەلمەگەن. قاراڭعى تۇسكەننەن كەيىن قىزدى تۋىستارى مەن كورشىلەرى ىزدەي باستاعان.
الايدا بۇل ارەكەتتەرى ەش ناتيجە بەرمەگەن سوڭ، قىزدىڭ تاتەسى پوليتسياعا بارعان.
پوليتسيا قىزمەتكەرلەرى جوعالعان بالانى ىزدەستىرۋگە قاتىستى بارلىق شارالاردى بىردەن قولعا الدى.
بۇل ىسكە ىشكى ىستەر دەپارتامەنتىنىڭ جەكە قۇرامىنان 90 اسكەري قىزمەتكەر تارتىلدى. قىز بالا ەكىنشى كۇنى عانا تابىلدى. سەبەبى، ونىڭ اقىل-ەس كەمدىگىنەن زارداپ شەگۋى ىزدەستىرۋ جۇمىستارىن قيىنداتتى. جاس ءوسپىرىمنىڭ اتا-اناسى قايتىس بولعان ەكەن، قازىر ونى تاتەسى تاربيەلەۋدە.
تابىلعان ادام دەرەۋ اۋرۋحاناعا جەتكىزىلدى. بولعان وقيعانىڭ ناقتى جاعدايلارى انىقتالۋدا.
