پرەزيدەنت كىتاپحاناسىنىڭ سايتىندا 13 ميلليوننان استام مالىمەت ساقتالادى
بۇل تۋرالى بۇگىن سايتتىڭ تۇساۋكەسەر راسىمىندە كىتاپحانانىڭ باسپا ءسوز حاتشىسى وكسانا لوسكۋتوۆا ايتتى.
«سايت ارقىلى ەلباسى كىتاپحاناسىنىڭ ەلەكتروندى كىتاپحاناسىمەن تانىسۋعا مۇمكىندىك بار. ول ەكى بولىكتەن - مەملەكەت باسشىسىنىڭ جەكە ەلەكتروندى كىتاپحاناسىنان جانە مالىمەتتەردىڭ ەلەكتروندى بازاسىنان تۇرادى. ەلەكتروندى بازا ارقىلى وقىرمان 13 ميلليون 132 مىڭ مالىمەتكە قول جەتكىزە الادى.
باعىتتارى سان- الۋان: ساياسات عىلىمدارى، الەۋمەتتىك عىلىمدار، تاريح، ەكونوميكا، مادەنيەت، ادەبيەت، مەنەدجمەنت، گەوگرافيا جانە تاعى دا باسقا كوپتەگەن سالالار قامتىلعان. سايتىمىزعا تىركەلگەن ادام دۇنيەجۇزىلىك ەلەكتروندى كىتاپحانامەن جانە ەلەكتروندى جۋرنالدار كىتاپحاناسىمەن جۇمىس ىستەۋگە ەرەكشە مۇمكىندىك الادى»، - دەپ اتاپ ءوتتى ول.
سونىمەن قاتار، سايتقا تىركەلگەن قولدانۋشى «بۇلتتى قور- مۇراعاتى 20+» جوباسىمەن (سەنسورلى ەكران) جۇمىس ىستەۋگە مۇمكىندىك الادى. وندا مەملەكەت باسشىسىنىڭ قىزمەتىنە بايلانىستى فوتو، بەينەمۇراعات ءبىر جۇيەگە كەلتىرىلگەن.
«سايتتىڭ تاعى ءبىر ەرەكشەلىگى - ينتەرنەت- تەليەۆيزيا. وندا ەلباسى كىتاپحاناسىندا بولعان شارالار بەينەماتەريال، فيلم تۇرىندە جۇكتەلەدى. سونىمەن قاتار ينتەرنەت- تەلەۆيزيا ارقىلى بەلگىلى ءبىر شارانى ونلاين رەجيمدە تاراتۋعا مۇمكىندىك بار»، - دەيدى و. لوسكۋتوۆا.
سونداي- اق، كىتاپحانا سايتىنىڭ ۆيرتۋالدى تۋرى ارقىلى قاشىقتىقتان مەملەكەت باسشىسىنىڭ جەكە كىتاپحاناسىنىڭ كونتەنتىمەن، «الەمدى وزگەرتەتىن يدەيالار» اتتى ينتەراكتيۆتى ءبىلىم بەرۋ ورتالىعىمەن جۇمىس ىستەۋگە بولادى.
