قازاقستان بايلارى 138 ميلليارد دوللاردى سىرتقا اپارىپ تىققان
بۇل سوما ەلىمىزدىڭ ءبىر جىلدىق جالپى ىشكى ءونىمى مولشەرىندەي قارجى.
سىرتقا شىققان اقشانىڭ ءبارى وفشورلىق ايماقتاردا، الپاۋىت مەملەكەتتەردىڭ بانكتەرىندە جاتىر. ال، ۇكىمەت جىلدىڭ اياعىنا دەيىن تاساداعى قارجىسىن جاريالاپ، ەلگە قايتارعان وليگارحتارعا راقىمشىلىق جاسالادى دەگەن.
31-ارنانىڭ مالىمدەۋىنشە، ساراپشىلار بايلاردىڭ زاڭسىز ارەكەتىن زاڭداستىرىپ بەرگەننەن، سىرتقا كەتكەن اقشا قايتىپ ورالادى دەگەنگە سەنبەيدى.
شۆەيتساريا بانكتەرىندە ساقتالعان ەكس-اكىمدەردىڭ بىرىنە تيەسىلى قارجىنىڭ ءوزى 100 ميلليون ەۋرو كولەمىندە. بۇل قارجى ەكونوميكاسى ءالجۋاز كەيبىر مەملەكەتتەردىڭ ءبىر جىلدىق بيۋدجەتىمەن تەڭ.
ءبىر قىزىعى، ۆيكتور حراپۋنوۆتىڭ ءبىر تۇندە ءبۇتىن بايلىعىن، ۇشاققا تيەپ الىپ كەتكەنى تۋرالى وسى ۋاقىتقا دەيىن جاق اشپاي كەلگەن باس پروكۋراتۋرا، ەكس-اكىمنىڭ ارنايى جۇك ۇشاعىن جالداعانىن تەك ەندى عانا ايتىپ، كەدەننەن قانداي زات وتكىزگەنىن انىقتاۋ كەرەك دەدى.
الايدا، ساراپشىلار ەكس-اكىمنىڭ وزىمەن بىرگە ءجۇز تونناعا جۋىق جۇك الىپ كەتكەنىن قۇزىرلى ورگاندار بىلمەي قالدى دەگەنگە سەنبەيدى.
«جۇيەنىڭ جوقتىعى، ءبىر ىزدىلىكتىڭ جوقتىعى، وڭ قولدىڭ سول قولدىڭ نە ىستەپ وتىرعانىن بىلمەيتىندىگى. جانە وسىنداي جاعداي قايتالانا بەرسە حراپۋنوۆتان كەيىندە تالاي وليگارحتاردىڭ، شەنەۋنىكتەردىڭ شەتەلگە كەتكەنىن ءالى كورەمىز»، - دەدى ساياساتتانۋشى راسۋل جۇمالى.
