ماسكەۋدە قاردىڭ تولاسسىز جاۋۋى سالدارىنان 130 دان استام اۋە رەيسى توقتاتىلدى
اەرودرومدى قاردان تازالاۋ جۇمىستارى ءاربىر 25 مينۋت سايىن جۇرگىزىلۋدە، دەپ حابارلايدى بي-بي-سي. قار تازالاۋ تەحنيكاسىنىڭ جۇمىسى كەزىندە ۇشاقتار كۇتۋ رەجيمىندە تۇرادى. ەڭ كوبى - 105 رەيس دومودەدوۆو اۋەجايىندا توقتاتىلدى.
ماسكەۋدەگى قالىڭ قاردىڭ تۇسۋىنەن تۋىنداعان كەپتەلىستەر دە شەگىنە جەتتى. «ياندەكس. كەپتەلىستەر» سەرۆيسىنىڭ مالىمەتتەرىنشە، جولداردىڭ تۇسكە دەيىنگى كەپتەلىسى بيىلعى جىلى ءبىرىنشى رەت ەڭ كوپ كورسەتكىشى - 10 بالعا دەيىن جەتكەن.
سينوپتيكتەردىڭ بولجامىنشا، بەيسەنبى كۇنى قالاداعى قار جامىلعىسىنىڭ بيىكتىگى توقتاماي جاۋىپ تۇرعان قار سالدارىنان 20 سانتيمەترگە جەتۋى مۇمكىن.
قۇتقارۋشىلار ماسكەۋدە قاردىڭ ءتۇسۋى مەن بۇرقاسىن سالدارىنان اعاشتار قۇلاپ، ەلەكتر تاسىمالداۋ جەلىلەرىنىڭ ءۇزىلۋى مۇمكىن ەكەنىن ەسكەرتەدى.
