ازىق-تۇلىكتى ارزانداتۋ ءۇشىن 1300 دەن استام تاۋارعا كەدەندىك باج الىنىپ تاستالدى
بۇل تۋرالى ساۋدا جانە ينتەگراتسيا ءمينيسترى سەرىك جۇمانعارين ۆەدومستۆونىڭ كەڭەيتىلگەن القا وتىرىسىندا ءمالىم ەتتى، دەپ حابارلايدى «قازاقپارات» ءتىلشىسى.
«رەسەي مەن بەلارۋسكە قاتىستى قابىلدانىپ جاتقان شەكتەۋ شارالارىن ەسكەرە وتىرىپ، ەۋرازيالىق ارىپتەستەرمەن بىرلەسە داعدارىسقا قارسى شارالار تىزبەسى بەكىتىلدى. نارىقتى قاجەتتى ازىق-تۇلىكپەن قامتۋ جانە باعانىڭ ءوسۋىن تەجەۋ ماقساتىندا يمپورتتىڭ 1300 دەن استام تاۋارىنا كەدەندىك باجدار الىنىپ تاستالدى. سونىمەن بىرگە، يرانمەن ەركىن ساۋدا ايماعى تۋرالى كەلىسىم 2025-جىلعا دەيىن ۇزارتىلدى. ول قازاقستاندىق ەكسپورتتى %9,3 عا، ياعني 282,7 ميلليون دوللارعا دەيىن وسىرۋگە مۇمكىندىك بەرەدى»، - دەپ توقتالدى سەرىك جۇمانعارين.
ونىڭ ايتۋىنشا، ەركىن ساۋدا ايماعى تۋرالى كەلىسىمدى يندونەزيا جانە بىرىككەن اراب امىرلىگىمەن جاساۋ جوسپارلانىپ وتىر. وعان سايكەس، بولجامدى ەكسپورتتىق ءوسىم 1 ميلليارد دوللاردان اسادى. بۇدان وزگە ۆيتسە-پرەمەر الداعى ۋاقىتتا سەرىكتەس ەلدەرمەن كولىكتىك-لوگيستيكالىق مارشرۋتتاردى دامىتۋ بويىنشا جۇمىستار اتقارىلاتىنىن اتاپ ءوتتى.
بۇعان دەيىن مينيستر ەلدىڭ وزبەكستانمەن اراداعى شەكاراسىندا «ورتالىق ازيا» حالىقارالىق ونەركاسىپتىك كووپەراتسيا ورتالىعى قۇرىلىپ جاتقانىن ءمالىم ەتتى.
