ۇلتتىق دومبىرا كۇنى: ەلورداداعى مەرەكەلىك كونسەرتكە 1300 دەن اسا ادام قاتىسپاق
بۇل تۋرالى بۇگىن استانا قالالىق مادەنيەت باسقارماسىنىڭ باسشىسى بولات ماجاعۇلوۆ ايتتى، دەپ حابارلايدى قازاقپارات ءتىلشىسى.
«ەلىمىزدىڭ مىڭداعان مۋزىكانت دومبىراشىسىنىڭ قاتىسۋىمەن وتەتىن «دومبىرا اسىل مۇرا ءۇنى» اتتى كونسەرت ۇلتتىق دومبىرا كۇنى مەرەكەسىنىڭ كوركىن كەلتىرمەك. كورەرمەندەر تانىمال قوعام قايراتكەرلەرى سەكەن تۇرىسبەكوۆ، بەكبولات تىلەۋحان، ايتجان توقتاعان، ايتقالي جايىموۆ، ايگۇل ۇلكەنبايەۆا، اسىلبەك ەڭسەپوۆ، ارت دومبىرا تريوسى، مۋزارت توبىنىڭ ونەرىن تاماشالايدى»، - دەدى ول.
سونىمەن قاتار ونىڭ ايتۋىنشا، قۇرمانعازى اتىنداعى قازاق مەملەكەتتىك ۇلتتىق اسپاپتار وركەسترى، وتىرار سازى ۇلتتىق اسپاپتاردىڭ فولكلورلىق- ەتنوگرافيالىق وركەسترى، استانا قالاسىنىڭ مەملەكەتتىك اكادەميالىق فيلارمونياسىنىڭ ۇلتتىق اسپاپتار وركەسترى، تاتتىمبەت اتىنداعى اكادەميالىق ۇلتتىق اسپاپتار وركەسترى جانە اقتاۋ قالاسىنىڭ قازاق ۇلتتىق اسپاپتار وركەسترى ساحنا تورىنە شىعادى.
«نيەت بىلدىرگەندەردىڭ بارلىعى ساحناعا شىعىپ، دومبىرا تارتۋ ونەرىن كورسەتە الادى. ول ءۇشىن asyldombyra.kz سايتىندا ونلاين تىركەلىپ، «كوڭىلاشار»، «اداي»، «بالبىراۋىن»، «سارىارقا»، «ەركە سىلقىم» كۇيلەرىن جاتقا ءبىلۋ قاجەت. قازىرگى كەزدە استانادا ۇلتتىق دومبىرا كۇنىن مەرەكەلەۋگە ارنالعان كونسەرتكە قاتىسۋ ءۇشىن 1300-دەن اسا ادام تىركەلدى. دومبىرانىڭ كۇمىستەي سىڭعىرلاعان ءۇنى توگىلىپ تۇراتىن مۇنداي اۋقىمدى شارا ەلوردادا بۇرىن-سوڭدى بولماعانىن اتاپ وتكەنىمىز ءجون»، - دەدى بولات ماجاعۇلوۆ.
