نەگىزگى ۇ ب ت- عا قاتىسقان 130 مىڭ تالاپكەردىڭ 67 پايىزى عانا شەكتى بالدى جينادى
ۇ ب ت باستالعالى شەكتى بالدى % 67 جۋىق تالاپكەر جينادى. ورتاشا بالعا كەلەتىن بولساق، ول - 65 بالل. تالاپكەرلەردىڭ، سونىڭ ىشىندە ەرەكشە ءبىلىم بەرۋ قاجەتتىلىگى بار تالاپكەرلەردىڭ تەستىلەۋدى ىڭعايلى تاپسىرۋى ءۇشىن ۇ ب ت تاپسىرۋ ۋاقىتى 40 مينۋتقا ۇزارتىلدى. سونىمەن قاتار، ولار ءۇشىن سىزبا جانە دياگرامماسىز سۇراقتار جاسالدى. قابىلدانعان شارالار ارقاسىندا ەرەكشە ءبىلىم بەرۋ قاجەتتىلىكتەرى بار تەستىلەنۋشىلەر سانى ارتىپ كەلەدى.
جالپى نەگىزگى ۇلتتىق ءبىرىڭعاي تەستىلەۋگە قاتىسۋعا 290 مىڭعا جۋىق ءوتىنىش كەلىپ ءتۇستى. ەستەرىڭىزگە سالا كەتەيىك، مەملەكەتتىك ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن ۇ ب ت 16- مامىردا باستالىپ، 2022 -جىلعى 5- شىلدەگە دەيىن جالعاسادى. بۇل رەتتە تالاپكەرلەر تەستىلەۋ ورنى مەن ۋاقىتىن وزدەرى تاڭدادى. بيىل تالاپكەرلەرگە ىڭعايلى بولۋ ءۇشىن العاش رەت ۇ ب ت- نىڭ كۇنىن، ۋاقىتىن، ورنى مەن بەيىندىك پاندەرىن ەسكە سالاتىن SMS جولداندى. حابارلاما ۇ ب ت- عا قاتىسۋشىلاردىڭ وزىنە، سونداي- اق كامەلەت جاسىنا تولماعان تەستىلەنۋشىلەردىڭ اتا- اناسىنا نەمەسە زاڭدى وكىلدەرىنە جىبەرىلەدى.
اكادەميالىق ادالدىقتى ساقتاۋ ماقساتىندا تالاپكەرلەردىڭ تەست نۇسقاسى تاڭبالاندى. ياعني ۇ ب ت- نىڭ ءاربىر قاتىسۋشىسىنىڭ جەكە تەست نۇسقاسى بولادى. ەرەجە بۇزعان جانە تەست تاپسىرماسىن اۋديتوريادان شىعارۋعا تالپىنعان جاعدايدا ۇلتتىق تەستىلەۋ ورتالىعى ولاردى انىقتاپ، ناتيجەسىن جويادى. بۇگىنگى تاڭدا 174 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجە بۇزعانى ءۇشىن اۋديتوريادان 159 ادام شىعارىلىپ، ولاردىڭ جيناعان بالى جويىلدى.
«پروكتورينگ تەك كىرگىزۋ جانە ۇ ب ت وتكىزۋ بارىسىندا عانا ەمەس، سونىمەن قاتار تەستىلەۋ اياقتالعان سوڭ دا جۇرگىزىلەدى. قازىرگى تاڭدا پوستپروكتورينگ، ياعني بەينەجازبالاردى قايتا تەكسەرگەننەن كەيىن 14 تەستىلەنۋشىنىڭ ناتيجەسى جويىلدى. بەينەجازبالارعا تالداۋ جىلدىڭ سوڭىنا دەيىن جۇرگىزىلەدى. تىيىم سالىنعان زاتتاردى پايدالانۋ جانە ەرەجە بۇزۋ فاكتىلەرى انىقتالعان جاعدايدا، وقۋعا ءتۇسۋشىنىڭ ۇ ب ت كورسەتكىشى كۇشىن جويادى»، - دەپ اتاپ ءوتتى ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
ەستەرىڭىزگە سالا كەتەيىك، ۇ ب ت- عا كىرگىزۋ ءۇش دەڭگەيلى جۇيە بويىنشا جۇزەگە اسىرىلادى: Face ID جەكە باسىن سايكەستەندىرۋ ارقىلى، جەكە كۋالىك بويىنشا، سونداي- اق وتىرعىزۋ ورنىندا جەكە باسىن سايكەستەندىرۋ جۇرگىزىلەدى.
بيىل تەستىلەۋ «1 كومپيۋتەر - 2 كامەرا - 1 تەستىلەنۋشى» قاعيداتى بويىنشا وتەدى. ەگەر بۇعان دەيىن تەستىلەۋ پروتسەسىن ءار كومپيۋتەردىڭ جوعارعى جاعىنان باقىلاپ وتىراتىن ءبىر كامەرا عانا بولسا، ەندى تەستىلەنۋشىنىڭ جەكە باسىن سايكەستەندىرۋگە جانە بوگدە ادامداردىڭ كىرۋىنە جول بەرمەۋگە مۇمكىندىك بەرەتىن ەكىنشى (فرونتالدى) كامەرا ورناتىلعان.
ايتا كەتەيىك، تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرە الادى. سەرتيفيكات اپەللياتسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
