الامان بايگە: 130 شاقىرىمدى 6 ساعات 38 مينۋتتا باعىندرعان تۇلپار
تاڭدا باستالعان الامان ءتۇس اۋا قىزا تۇسكەن. ۇكىلەپ اكەلگەن 33 اتتىڭ بارلىعى مارەگە جەتپەيتىنى ورتا جولدا بەلگىلى بولعان. ءبىر ات اياعىن ىنگە تىعىپ السا، ءبىرىنىڭ سىرعاسى تايىپ، بىرنەشە ات جارىستى ەرتە اياقتادى. دەگەنمەن، ەشبىر ات بولدىرىپ نەمەسە زورىعىپ قۇلاعان جوق.
جىلدامدىقتان گورى توزىمدىلىك سىنعا تۇسكەن بايگەدە الدىڭعى ءۇش ورىندى كاتونقاراعاي اۋدانىنىڭ ءۇش اتى يەمدەنىپ كەتتى. ءۇش اتتىڭ يەلەرى بولەك ادامدار ەكەنىن ايتا كەتۋ كەرەك. مارە سىزىعىن ءبىرىنشى بولىپ كەسكەن - ەربولات توقسانوۆتىڭ «تارپاڭ» اتتى تۇلپارى.
اتتاردىڭ تاڭعى ساعات 7.47 دە جارىسقا شىققانىن بۇعان دەيىن حابارلاعان بولاتىنبىز. «تارپاڭ» 130 شاقىرىمدى 6 ساعات 38 مينۋتتا ءجۇرىپ ءوتىپ، يەسىنە 1 ميلليون تەڭگەنىڭ جۇلدەسىن سىيلادى.
جۇلدەلى ءتورتىنشى ورىندى اياگوز اۋدانىنىڭ كۇلىگى يەلەنسە، 5-6-7- ورىنداردىڭ جۇلدەسىن زايسان اۋدانىنىڭ ارعىماقتارى الدى.
«بۇل ات بۇرىن-سوڭدى بايگەگە تۇسپەگەن. جىلقى ىشىندە بوس جۇرگەن مال ەدى. اكەسى جاعىنان دا، شەشەسى جاعىنان دا جارتىلاي اسىل تۇقىمدى دەۋگە بولادى. شاباندوزى - سەرگەي رىبين دەگەن جۇمىسشىم. 15 جاسىنان بەرى مەنىڭ جانىمدا مال باعىپ، ات باپتاپ كەلەدى. قازىر جاسى 28 دە. وسى «تارپاڭدى» بايگەگە دايىنداعان دا ءوزى. تاڭداۋى تەرىس بولماعان سياقتى. اتىمىز مارەگە امان جەتكەنىنە قۋانىشتىمىز»، - دەيدى ات يەسى ەربولات توقسانوۆ.
