جەتىسۋ وبلىسىندا بيىل 12 بلوك-مودۋلدى مەديتسينالىق كەشەن ىسكە قوسىلادى
«اۋىلدىق جەرلەردەگى مەديتسينالىق قىزمەت ساپاسىن جاقسارتۋ ماقساتىندا قولعا الىنعان قۇرىلىس نىسانى الاكول اۋدانىنىڭ كوكجار اۋىلىندا تۇرعىزىلدى. بۇل - وبلىستا بيىلعا جوسپارلانعان ون ەكى مەكەمەنىڭ جەتىنشىسى»، - دەپ جازدى جەتىسۋ وبلىسى اكىمىنىڭ باسپا ءسوز قىزمەتى.
بۇل مەديتسينالىق پۋنكت كوكجار اۋىلىنىڭ 160 تۇرعىنىنا قىزمەت كورسەتەدى.
جوبانىڭ جالپى قۇنى - 39 ميلليون تەڭگە. عيماراتتىڭ اۋماعى - 108 شارشى مەتر. 12 تۇرعىنجايى بار، اتاپ ايتقاندا ۆەستيبيۋل، ءدالىز، ءدارىحاناسى بار تىركەۋ ورنى، اكۋشەرلىك قابىلداۋ بولمەسى، ەگۋ بولمەسى، پروتسەدۋرالىق كابينەت، ماتەريالدار الۋ مەن زەرتتەۋ بولمەسى، ورتا مەديتسينالىق قىزمەتكەرلەر بولمەسى، 2 دارەتحانا، سول سياقتى باسقا دا تۇرمىستىق- شارۋاشىلىق قاجەتتىلىكتەگى تۇرعىنجايلارى بار. ىستىق سۋ، جىلۋ جۇيەسى جۇرگىزىلگەن، جەلدەتكىش ورناتىلعان.
جالپى جىل سوڭىنا دەيىن وڭىردە تاعى 5 بلوك-مودۋلدى كەشەندى ىسكە قوسۋ جوسپارلانعان. اقسۋ، الاكول، ەسكەلدى، كوكسۋ، قاراتال جانە كەربۇلاق اۋداندارىندا جالپى قۇنى 900 ميلليون تەڭگە بولاتىن بارلىعى 12 نىسان جوسپارلانعان.
مامانداردىڭ ايتۋىنشا، بلوك-مودۋلدى كەشەندەر بەرىك، قاراپايىم ورناتىلاتىن، ۇزاق قىزمەت ەتەتىن قۇرىلىس ءتۇرى. سونىمەن بىرگە قولايسىز اۋا رايىنا توتەپ بەرە الادى، ولاردىڭ قىزمەت ەتۋ مەرزىمى 30 جىل دەپ مەجەلەنەدى.
