اباي وبلىسىندا جاس جىگىت 12 جىل بويى قۇلدىقتا بولعان
اباي وبلىسىنىڭ پوليسەيلەرى جەدەل- پروفيلاكتيكالىق شارا بارىسىندا ادام ەڭبەگىن قاناۋ فاكىسىن انىقتادى.
وزىنە بەكىتىلگەن اۋماقتى تەكسەرۋ بارىسىندا تۇرعىندارمەن ۇنەمى بايلانىستا جۇرەتىن جارما اۋدانى شار قالاسى پ ب پوليسيا قىزمەتكەرىنە اۋماعىنداعى شارۋا قوجالىعىنىڭ باسشىسى قوڭىراۋ شالىپ، جاڭا جۇمىسشى جالداعانىن حابارلاعان.
شارۋا قوجالىعىنا كەلگەن پوليسيا قىزمەتكەرى جۇمىسقا جاڭادان كىرىسكەن جالدامالىنىڭ قۇجاتتارىنىڭ جوقتىعىن انىقتاعان، سونداي- اق پوليسەيگە ءوزىنىڭ ساۋالنامالىق دەرەكتەرىن دە ايتا الماعان.
ءبىر شيكىلىكتىڭ بارىن سەزگەن ءتارتىپ ساقشىسى شارۋاشىلىق يەسى جابىرلەنۋشىنىڭ قاسىنان كەتكەن كەزدە ونىڭ تەگىن ءبىلىپ العان.
ودان ءارى پوليسيا قىزمەتكەرى جابىرلەنۋشىنىڭ اپكەسىن تاپتى. بەلگىلى بولعانداي، ول باۋىرىمەن 2010 -جىلدان بەرى بايلانىس ۇزگەن.
ەر ادام جارما اۋدانىنداعى شارۋا قوجالىقتارىنىڭ بىرىنەن تابىلدى. ول وندا جۇمىس ىستەگەن.
تەرگەۋ بارىسىندا 2010 -جىلدىڭ قاراشا ايىنان باستاپ 26 جاستاعى ەر ادامنىڭ 11 شارۋا قوجالىعىندا قۇلدىقتا بولعانى انىقتالدى.
بۇعان دەيىن بىرنەشە رەت سوتتالعان 54 جاستاعى سەمەي تۇرعىنى 26 جاستاعى تارباعاتاي اۋدانىنىڭ تۇرعىنىمەن تۇعىل اۋىلىنا بالىق اۋلاۋعا بارعاندا تانىسقان.
فيزيكالىق تۇرعىدان جەتىلگەن جاس جىگىتتىڭ پسيحيكالىق اۋىتقۋىن بايقاعان ول جىگىتتى شارۋاشىلىقتا جۇمىس كۇشى رەتىندە پايدالانۋدى ويلاعان.
جابىرلەنۋشىنى 12 جىلدان استام ۋاقىت بويى سەمەي قالاسى، اباي، ۇلان جانە جارما اۋداندارىنداعى شارۋا قوجالىقتارىندا جۇمىس ىستەۋ ءۇشىن ساتقان.
54 جاستاعى ازامات شارۋا قوجالىق يەلەرىنە ءوزىن جىگىتتىڭ تۋىسىمىن دەپ تانىستىرعان.
ولاردان الدىن الا جالاقىسىن الىپ، قالتاسىنا باسىپ وتىرعان. جابىرلەنۋشىنىڭ جىلدار بويى ەڭبەگىنە بەرىلگەن اقى 2 ميلليون تەڭگەنى قۇراعان.
سونىمەن قاتار قاسكوي مۇگەدەكتىڭ اي سايىنعى زەينەتاقى جيناعى مەن الەۋمەتتىك تولەمدەرىن جىمقىرىپ وتىرعان. زالالدىڭ جالپى سوماسى 4 ميلليون تەڭگەدەن اسادى.
- قازىرگى ۋاقىتتا جابىرلەنۋشى تۋىستارىنا تابىستالدى، ال كۇدىكتى جارما اۋدانىنىڭ اۋداندىق سوتىمەن قىلمىستىق كودەكستىڭ 128-بابىنىڭ 2-بولىگى 2, 8, 11, 12-بولەكتەرى جانە 190-بابى 1-تارماعىنىڭ 3-بولىگى بويىنشا كىنالى دەپ تانىلدى. سوت ۇكىمىمەن قاۋىپسىزدىگى ورتاشادا كولونيادا 4 جىل 6 ايعا باس بوستاندىعىنان ايىرۋ جازاسى تاعايىندالدى، - دەدى اباي وبلىسى پ د باستىعىنىڭ ورىنباسارى ناريمان كۇلدىكوۆ.
