ءار ادام ءوز بالاسى ءۇشىن جاۋاپتى، مەملەكەتكە ىسىرا سالۋعا بولمايدى - 12 بالانىڭ اناسى
«پرەزيدەنتتىڭ ۇلتتىق قوردىڭ جىل سايىنعى ينۆەستيتسيالىق كىرىسىنىڭ 50 پايىزى ەسەبىنەن بالالارعا 18 جاسقا تولعانعا دەيىن ارنايى جيناقتاۋ شوتتارىن اشۋ ۇسىنىسىن مەن تەك كوپبالالى انا رەتىندە عانا ەمەس، سونداي- اق تۇرمىستىق زورلىق- زومبىلىققا ۇشىراعان ايەلدەرگە قۇقىقتىق جانە پسيحولوگيالىق قولداۋ كورسەتىپ كەلە جاتقان مامان رەتىندە دە جوعارى باعالادىم. بۇل - مەملەكەتتىڭ وسكەلەڭ ۇرپاققا دەگەن زور قولداۋى مەن قامقورلىعى»، - دەيدى ول.
سونىمەن بىرگە، ول ءسابي كۇتىمى بويىنشا تولەمدەر مەرزىمىن ۇزارتۋ ماسەلەسى - انا مەن بالانى قولداۋ باعىتىنداعى ىلگەرىلەۋ نىشانى دەپ قابىلدايدى.
«مەملەكەت باسشىسى بالا ءبىر جاسقا تولعانشا تولەنەتىن جاردەماقىنى 1,5 جىلعا دەيىن ۇزارتۋدى تاپسىردى. بۇل ارينە، دەكرەتتەگى انا ءۇشىن وتە جاعىمدى جاڭالىق. دەگەنمەن، وسى جەردە ءبىر ايتا كەتەرلىگى، ءبىزدىڭ ەلىمىزدە بالانى ەكى جاسقا دەيىن قابىلدايتىن بالاباقشالار جوقتىڭ قاسى. سوندىقتان، بالاسى 1,5 جاسقا تولعان انالاردىڭ بىردەن جۇمىسقا شىعىپ كەتۋى ەكىتالاي. بىرىنشىدەن، بالاسى كىشكەنتاي انانى ەشكىم جۇمىسقا العىسى كەلمەيدى. ەكىنشىدەن، جاس بالا اۋرۋشاڭ كەلەدى، ءسابيى ءجيى ناۋقاستانا بەرگەن انا دۇرىس جۇمىس ىستەپ جارىتپايدى. الداعى ۋاقىتتا وسى ماسەلە دە ەسكەرىلسە ەكەن، ياعني تىم بولماعاندا 2 جاسقا تولعانشا جاردەماقى تولەنسە ارتىق بولمايدى دەپ ەسەپتەيمىن. ارينە، مەملەكەتتىڭ مۇمكىندىگى بارلىعىنا بىردەي جەتە بەرمەيتىنىن بىلەمىز. دەگەنمەن، «جاڭا قازاقستاندا» بۇل ماسەلەلەر وڭ شەشىلەدى دەپ سەنىممەن ايتا الامىن. ەڭ باستىسى، العاشقى ماڭىزدى قادام جاسالدى. مۇنى پرەزيدەنت جولداۋىندا ايتىلعان مىندەتتەردەن اڭعارۋعا بولادى»، - دەپ قوستى كوپبالالى انا.
قۇرالاي جۇمابەكوۆا - «كۇمىس القا» يەگەرى، ول التى بالانى دۇنيەگە اكەلىپ، تاعى التى بالانى باۋىرىنا باسقان. قوعامدىق جۇمىستارعا دا بەلسەندى ارالاسادى. بۇگىنگى كۇنى ول جەتەكشىلىك ەتىپ وتىرعان «انا ءۇيى» رەسۋرستىق ورتالىعى مەن «دەمەۋ سەنىم» قوعامدىق قورى تۇرمىستىق زورلىق- زومبىلىققا ۇشىراعان ايەلدەرگە قۇقىقتىق جانە پسيحولوگيالىق قولداۋ كورسەتەدى. ونىڭ سوزىنشە، ايەلدەردىڭ الەۋمەتتىك، تۇرمىستىق جاعدايىن شەشۋدە ءالى دە ءبىرقاتار ماسەلە بار.
«ءتۇرلى جاعدايمەن تۇسكەن جاس انالار تۇرمىستىق جاعدايلارىن جاقسارتىپ العانشا، التى ايعا دەيىن «انا ءۇيى» رەسۋرستىق ورتالىعىندا بولادى. ولاردىڭ مۇندا كەلۋىنە سان ءتۇرلى سەبەپ بار. ماسەلەن، ەرتە جۇكتىلىك ماسەلەسى، بۇل رەتتە قىز بالاعا عانا كىنا ارتقان دۇرىس ەمەس. نارەستەسىن قۇشاقتاپ جالعىز قالاتىن جاس انالار قولداۋعا ءزارۋ. بالا تاعدىرىمەن ويناۋعا بولمايدى. ءار ادام ءوز بالاسى ءۇشىن جاۋاپتى. سول سەبەپتى، بۇل ماسەلەنى مەملەكەتكە ىسىرا سالماۋ كەرەك. جاقىندا ءبىر وتباسى ورتالىققا كەلىپ، نەمەرەلەرىمەن قاۋىشتى.
بىزگە تۇرمىستىق زورلىق-زومبىلىقتان جاپا شەككەن ايەلدەر دە كومەك سۇراپ كەلەدى. وسى جىلدار ىشىندە ورتالىقتا تۇرىپ، ماماندىق الىپ، جۇمىسقا ورنالاسقان انالار كوپتەپ سانالادى. ولارعا قولدان كەلگەنشە كومەك كورسەتەمىز. ورتالىقتا تۇرۋ تەگىن. ازىق- تۇلىك، كيىم- كەشەكپەن قامتاماسىز ەتىلگەن. قازىرگى ۋاقىتتا بەس جاس انا تۇرىپ جاتىر. بارلىعى جۇمىس ىستەيدى. ورتالىقتا تۇرعان جارتى جىل ىشىندە قاراجات جيناپ، تۇرمىستارىن تۇزەۋگە مۇمكىندىك بار. ەڭ قيىنى - باسپانا. قالادا پاتەر جالداپ تۇرۋ وتە قىمبات. جاس انالاردىڭ كوبىنىڭ ماماندىعى جوق. ەدەن جۋۋشى، سانيتار جالاقىسىمەن پاتەر جالداپ، كۇن كورۋ مۇمكىن ەمەس. وسى ماسەلە بويىنشا جەرگىلىكتى اكىمدىككە الەۋمەتتىك جاعدايى تومەن جاندارعا ارناپ جاتاقحانا سالۋ جونىندە ۇسىنىس بىلدىردىك. جولداۋدا ايتىلعانداي، ەندىگى ارادا مەملەكەتتىك ورگاندار جۇمىسىن جاقسارتىپ، ناتيجەسىن ارتتىرۋى ءتيىس. سوندا وسى ايتىلعان ماسەلەلەر بىرتىندەپ شەشىلەتىن بولادى»، - دەپ تۇيىندەدى كوپبالالى انا.
ايتا كەتسەك، بۇدان بۇرىن جۇمىس ىستەمەيتىن اتا-انالار ءۇشىن دە بالا كۇتىمىنىڭ الەۋمەتتىك تولەمى 1,5 جىلعا ۇزارتىلاتىنىن جازعان ەدىك.
