رەسەيدە كوروناۆيرۋسقا بايلانىستى شەكتەۋ 12- مامىرعا دەيىن سوزىلۋى مۇمكىن
«روسپوترەبنادزور» باسشىسى اننا پوپوۆا وسىلاي مالىمدەدى، دەپ حابارلايدى قازاقپارات تاسس اگەنتتىگىنە سىلتەمە جاساپ.
«مەن بۇنى ادىلەتتى ۇسىنىس دەپ سانايمىن، ءبىز عالىمدارمەن سويلەستىك، ولار دا وسى پىكىردە»، - دەدى پوپوۆا تەلەارناعا بەرگەن سۇحباتىندا.
ول رەسەيلىكتەردىڭ قازىرگى كەزدە ەكى ينكۋباتسيالىق كەزەڭ، شامامەن 28-30 كۇن «قارىم-قاتىناستى ءۇزۋ رەجيمىندە» جۇرگەنىن ءتۇسىندىردى.
الايدا ىندەتكە شالدىققان ادامدار سانىنىڭ ايتارلىقتاي ازايىپ، باقىلانىپ وتىرعان ناتيجەنى بەكىتۋ ءۇشىن تاعى ءبىر ينكۋباتسيالىق كەزەڭ قاجەت بولىپ وتىر. پوپوۆا رەسەيدە ۆيرۋس جۇقتىرۋ وقيعالارىنىڭ ءوسىمى بايقالماي وتىرعانىن اتاپ ءوتتى.
«تومەندەۋ - بۇل كۇن سايىن تىركەلىپ وتىرعان وقيعالار سانىنىڭ كەلەسى كۇنگە قاراعاندا ازايۋى. ازىرگە جۇقتىرۋشىلاردىڭ ديناميكالىق ءبىرقالىپتى قيسىق سىزىعى قالىپتاسقان، ونى تومەندەتۋ ءۇشىن بىزگە تاعى ۋاقىت قاجەت بولىپ تۇر»، - دەپ اتاپ ءوتتى ول.
